Partitë opozitare shqiptare: Nuk i votojmë ndryshimet kushtetuese pa u pranuar amendamentet tona dhe heqja e 20 përqindshit
Pas intervistës së djeshme të liderit të Lëvizjes BESA, Bilal Kasami, se deputetët e tyre nuk do të votojnë për amendamentet për përfshirjen e bullgarëve në Kushtetutë, nëse nuk fshihet formulimi “20% e gjuhës që flasin qytetarët”, ndërsa formulimi i ri të jetë “Gjuha shqipe”, sot i njëjti reagim ka ardhur nga partitë Alternativa dhe Lëvizja Demokratike, transmeton Portalb.mk.
Deputetja e Lëvizjes Demokratike, Merita Kollçi Koxhaxhiku, tha sot se mbeten të qëndrimit se nuk do të mbështesin ndryshimet kushtetuese, nëse fshirja e formulimit “20 për qindshit” nuk është pjesë e tyre.
“Si grup parlamentar nga Lëvizja Demokratike, ky ka qenë qëndrimi ynë që në fillim. Deri në këtë moment qëndrojmë në të njëjtin qëndrim”, tha ajo.
Deputetja e Alternativës Safije Sadiku Shaini, nga ana tjetër, tha se kjo parti nuk do t’i mbështesë ndryshimet kushtetuese nëse nuk pranohet amendamenti i tyre për korrupsion.
“Ne si Alternativë kemi deklaruar se duhet të pranojnë fillimisht amendamentin tonë kushtetues kundër korrupsionit. Nëse nuk pranohet ai amendament, ne nuk do të votojmë amendamentet kushtetuese”, tha ajo.
Amendamenti kushtetues i propozuar nga Alternativa parashikon që veprat penale të kryera nga zyrtarë të zgjedhur dhe të emëruar nuk do të vjetërohen kurrë. Gjithashtu propozohet zgjerimi i fushës së konfiskimit të pronës së fituar në mënyrë të paligjshme të regjistruar te palët e treta.
Më 18 gusht 2023 në Kuvendin e Maqedonisë së Veriut debati për fillimin e ndryshimeve kushtetuese mbaroi brenda pak orësh. Votimi nuk dihet ende kur do të bëhet.
Në mënyrë që të bëhen ndryshimet kushtetuese duhet dy e treta e votave, konkretisht 80 vota nga gjithsej 120 deputetë në Kuvend.
Partia më e madhe opozitare VMRO-DPMNE është deklaruar se nuk do t’i mbështesë këto ndryshime, ndërsa edhe nga opozita shqiptare kanë kushtëzuar që nuk do t’i votojnë ndryshimet nëse nuk ndryshohet definimi i 20% për gjuhën shqipe në Kushtetutë.
Ndryshimet kushtetuese nënkuptojnë shtimin e bullgarëve dhe kombeve tjera në Kushtetutë.
Kjo vjen si rezultat i asaj që Maqedonia e Veriut pas 17 vitesh me 19 korrik të vitit 2022 filloi bisedimet qasëse me BE-në me mbajtjen e konferencës së parë ndërqeveritare.
Megjithatë, negociatat nuk do të fillojnë derisa të bëhen ndryshimet kushtetuese. Nëse nuk bëhen ndryshimet kushtetuese deri në nëntor të këtij viti, procesi eurointegrues i RMV-së rrezikon të bllokohet përsëri.
- LEXO: Kasami: Nuk do t’i votojmë ndryshimet kushtetuese, Qeveria nuk e dëgjon zërin tonë
- LEXO: Eurokomisionerja e re bullgare, Shkupi do të fillojë negociatat me BE-në kur të ndryshojë Kushtetutën
- LEXO: Bujar Osmani: Ndryshimet kushtetuese, një mundësi historike për integrimin e Maqedonisë së Veriut
- LEXO: BE-ja e gatshme për anëtarë të rinj në vitin 2030, por jo edhe Maqedonia e Veriut
- LEXO: Michel: Deri më 2030 BE dhe shtetet kandidate të jenë gati për zgjerim
- LEXO: KE thotë se fokusohet në zgjerim dhe jo në afate kohore
- LEXO: A është i mundur zgjerimi i BE-së deri në vitin 2030?
- LEXO: Von der Leyen: E ardhmja e Ballkanit Perëndimor dhe Ukrainës është në BE