Mariçiq: Bllokadat e opozitës sjellin vetëm izolim dhe pasiguri për Maqedoninë e Veriut

By T. B. On 17/08/2023 22:09

Ikja nga miratimi i vendimeve shtetformuese dhe mospjesmarrja në procesin më të rëndësishëm nacional e vështirëson progresin e shtetit dhe na largon nga perspektiva evropiane dhe për këtë, tani nuk është koha për populizëm, ndërsa bllokadat e opozitës i sjellin shtetit izolim, pasiguri dhe lënë hapësirë për ndikim nga palët e treta, tha Mariçiq, transmeton Portalb.mk.

“Derisa opozita nuk qëndron proaktive dhe nuk jep mbështetje për plotësimet kushtetuese, rezutati është i qartë, ngecim këtu dhe sërish bllokohemi në dhomën e prites së BE-së. Ndërsa ajo nuk i sjell mirë askujt dhe nuk duhet ky të jetë qëllim i askujt, për çfarëdo lloj arsye, ndërsa më së paku politike”, tha Mariçiq.

Maqedonia e Veriut është në fazën kur anëtarësimi në BE është i arritshëm dhe ajo sipas Mariçiqit është shans i cili nuk duhet të lëshohet.

“Sa më gjatë që jemi jashtë procesit, aq më ke për ekonominë, për klimën e përgjithshme në shtet dhe aq më shumë të rinj do ta lëshojnë shtetin. Ajo më tej do ta dobësojë besimin në institucionet dhe do të jetë kërcënim për stabilitetin dhe prosperitetin e shtetit, ndërsa jam i sigurt se atë nuk e dëshiron askush dhe besoj se do të arrijmë t’i përfundojmë detyrimet e përbashkëta që i kemi në rrugën drejt anëtarësimit në BE”, tha Mariçiq.

Kryeministri i vendit – Dimitar Kovaçevski i pyetur se cili është plani i Qeverisë nëse nuk sigurohet shumica e kërkuar për ndryshimet kushtetuese, marrë parasysh qëndrimin e fundit të djeshëm nga deputetët e opozitares VMRO-DPMNE se nuk do të mbështesin këtë proces, nuk u përgjigj për këtë, por kritikoi deputetët e VMRO-DPMNE-së.

Kovaçevski në vend të përgjigjes i ka kritikuar deputetët e VMRO-DPMNE-së se nuk kanë shpjegim pse nuk do të përkrahin amendamentet kushtetuese.

“Cili është shpjegimi i VMRO-DPMNE-së pse është kundër, nuk thuhet në njoftim. Amendamentet kushtetuese nuk janë një diktat bullgar, është një kornizë negociuese e miratuar nga BE-ja”, tha Kovaçevski.

LEXO: Kovaçevski pa përgjigje se cili është plani i Qeverisë nëse nuk sigurohet shumicë për ndryshimet kushtetuese

Kryeministri sot ka deklaruar gjithashtu se në Kuvendin e RMV-së ka një dePutet i cili ishte pjesë e shërbimit sekret jugosllav dhe policisë UDBA-s, që nuk duan ta shohin RMV-në si pjesë të Bashkimit Evropian.

LEXO: Kovaçevski: Në Kuvendin e RMV-së ka deputet të UDBA-s, ka ndërtuar karrierë që vendi të mos jetë në BE

Nga ana tjetër, sot blloku opozitar shqiptar në Kuvend – Alternativa, Lëvizja Besa dhe Lëvizja Demokratike, përmes një konference për shtyp kushtëzuan se nëse nuk ndryshohet definimi i 20% për shqiptarët në kushtetutë, nuk do të përkrahin ndryshimet kushtetuese.

LEXO: Kushtëzon fronti opozitar shqiptar: Pa heqjen e 20% nuk ka ndryshime kushtetuese

Ndërsa ministri i Jashtëm – Bujar Osmani sot u ka dërguar letër deputetëve të Kuvendit ku u thotë se e ardhmja evropiane e vendit është para duarve të tyre.

LEXO: Osmani me letër deputetëve: Të premten ju vendosni për të ardhmen evropiane të RMV-së

Nesër në Kuvendin e Maqedonisë së Veriut pritet të fillojë seanca plenare për ndryshimet kushtetuese, të cilat pritet t’i hapin rrugën eurointegruese vendit.

Kryetari i Kuvendit të Republikës së Maqedonisë së Veriut, Talat Xhaferi më 19 korrik të këtij viti e pranoi propozimin e Qeverisë për fillimin e ndryshimit të Kushtetutës, ndërsa Komisioni për Çështje Kushtetuese në Kuvend më 25 korrik e miratoi propozimin. Me këtë, praktikisht filloi procedura për ndryshime kushtetuese sipas obligimit që e ka marrë Maqedonia e Veriut në korrik të vitit të kaluar gjatë fillimit të bisedimeve hyrëse me Bashkimin Evropian, dhe këto konkluzione ia kaloi Kuvendit.

Ndryshimet në Kushtetutë nënkuptojnë shtimin e kombeve në Preambulë dhe në nenet 49 dhe 78 kur numërohen pjesët e kombeve në shtet, ku përveç maqedonasve, shqiptarëve, turqve, vllahëve, serbëve, romëve dhe të tjerë, do të shtohen bullgarët, kroatët, malazezët, sllovenët, hebrenjtë dhe egjiptianët.

Kuvendi fillimisht duhet të votojë rendin e ditës me një pikë të vetme – Propozim për Fillimin e Ndryshimit të Kushtetutës së Republikës së Maqedonisë së Veriut, me udhëzime për ndryshimin dhe plotësimin e Kushtetutës së Republikës së Maqedonisë së Veriut, për të cilin nevojiten 61 vota.

Kjo seancë mund të zgjasë më shumë se dhjetë ditë pune.

Më pas, vendimin ndryshimin e Kushtetutës e merr Kuvendi me shumicë prej dy të tretave të numrit të përgjithshëm të deputetëve, pra me 80 vota. Nëse nuk ka shumicën e kërkuar, procedura nuk mund të vazhdojë.

Kujtojmë se, Maqedonia e Veriut pas 17 vitesh me 19 korrik të vitit 2022 filloi bisedimet qasëse me BE-në me mbajtjen e konferencës së parë ndërqeveritare. Megjithatë, negociatat nuk do të fillojnë derisa të bëhen ndryshimet kushtetuese për përfshirjen, mes tjerash edhe të bullgarëve në Kushtetutë nga pala e Maqedonisë së Veriut. Nëse nuk bëhen ndryshimet kushtetuese deri në nëntor të këtij viti, procesi eurointegrues i RMV-së rrezikon të bllokohet përsëri.