Bekteshi: Inflacioni në rënie, nga e enjtja nuk ka më çmime të ngrira

By N. D. On 29/05/2023 13:55

Kreshnik Bekteshi, foto: Ministria e Ekonomisë

Nga e enjtja nuk do të ketë produkte me çmime të ngrira. Ministri i Ekonomisë Kreshnik Bekteshi tha se nuk do ta zgjasë masën, e cila skadon të mërkurën, më 31 maj, transmeton Portalb.mk.

“Masa për ngrirjen e çmimeve të produkteve bujqësore nuk do të vazhdojë, pasi çmimi i disa produkteve tashmë është më i ulët se niveli i vendosur. Inflacioni në sferën e produkteve ushqimore është në rënie të theksuar, ndaj presim që në qershor inflacioni në vend të jetë më i ulët se dhjetë për qind”, tha Bekteshi, pas takimit me ministrin e Tregtisë së Jashtme dhe Marrëdhënieve Ekonomike të Bosnjës dhe Hercegovinë, Stasha Kosharac.

Bekteshi theksoi se gjendja me çmimet e produkteve është duke u monitoruar, në mënyrë që nëse vërehen keqpërdorime nga tregtarët, do të merren masat e duhura.

“Sipas të dhënave të fundit, inflacioni këtë vit do të jetë nën nivelin e parashikuar. Në sferën e masave të ndryshme, ne bëjmë analiza në baza ditore dhe ato gjithmonë mund të miratohen, këtë sigurisht që do ta bëjmë në bashkëpunim me odat ekonomike”, tha Bekteshi.

Muajt e fundit qeveria ka ngrirë çmimet e bukës, pastave, vezëve, orizit, disa perimeve, frutave, produkteve higjienike dhe produkteve të qumështit.

Qeveria me 25 prill vendosi që marzha e çmimeve të produkteve ushqimore do të jetë e ngrirë deri më 30 qershor të këtij viti.

Qeveria më 28 shkurt miratoi vendim për kufizimin e çmimit të bukës së bardhë dhe gjysmë të bardhë në 33 denarë. Ndërsa, nga 16 marsi hyri në fuqi vendimi i Qeverisë për zvogëlimin e çmimeve të pastave dhe prodhimeve të qumështit. Gjobat për mosrespektim të vendimit qeveritar lëvizin prej 800 deri në 10.000 euro.