Zejdi: Do të formoj parti të re, kam përkrahjen e qytetarëve
Skender Rexhepi – Zejdi i cili mori mandatin e deputetit si pjesë e Alternativës, njoftoi se do të formojë parti të re politike, duke nënvizuar se “ose duhet të largohem nga politika ose duhet të rrugëtoj politikisht disi”, raporton TV21.
Ai në SummerClick në TV21, tha se kjo vjen ngaqë udhëheqësia Alternativës nuk i dhanë mundësi ndryshimi në parti dhe se nuk e sheh veten si pjesë të asnjë subjekti tjetër aktiv në politikë.
“Kisha pritshmëri se do të ketë ndryshime në Alternativë, që të bëhem pjesë si anëtar dhe të jap kontributin tim. Me atë që çdokush që shpalli pakënaqësi, ndaj cilido qoftë në kuadër të udhëheqësisë, u largonte nga partia edhe me vendim të Kryesisë Qendrore, përfshirë edhe ata të Degës së Tetovës, atëherë u pa se mundësi ndryshimi në Alternativë nuk ka. Këta njerëz do ta fundosin Alternativën, por nuk ia japin askujt. Do t’i marrin vulat me vete, do t’i mbajnë si dekor, por subjekt politik nuk do të kenë. Do të thotë kështu do të vazhdojnë të bëjnë ata. Kjo me detyroi të mendoj se çfarë më tutje? E keni parë edhe te llogaridhënia dhe me takim me qytetarët, se ka përkrahje nga qytetarët për rrugëtimin politik që bëj unë. Pasi nuk e shoh veten te asnjë subjekt politik, sepse e kisha bindjen se te Alternativa duhet të jap shërbimin tim, por e pash se kjo nuk mund të ndodh. kështu vendosa të rrugëtoj me një subjekt të ri politik, bashkë me strukturat që i kemi”, tha Zejdi.
Kjo do të jetë partia e tretë e re politike në kampin politik shqiptar pas partive të formuara nga Izet Mexhiti i dalë nga radhët e BDI-së dhe Arjanit Hoxhës, i dalë nga radhët e Lëvizjes Besa.
Lëvizja Demokratike e Izet Mexhitit e paralajmëruar qysh në korrik, u formua më 13 gusht, ku po të njëjtin ditë mbajti kuvendin themelues.
LEXO: Izet Mexhiti themeloi partinë e re – Lëvizja Demokratike
Ndërsa në ditën paraprake, 12 gusht, u formua Partia Demokratike Evropiane me në krye Arjanit Hoxhën.