U shty gjykimi kundër Ramiz Merkos për blerjen e automjetit luksoz

By F. C. On 26/04/2024 20:16

Ramiz Merko, kryetari i Komunës së Strugës. Foto nga Ramiz Merko (Facebook)

Në Gjykatën Themelore në Strugë sot ka filluar procesi gjyqësor kundër kryetarit të Komunës së Strugës, Ramiz Merko për blerjen e makinës luksoze “Audi A6” në vlerë 67 mijë euro, raporton MIA. Pas kërkesës së mbrojtjes për shqyrtim të plotë të dosjeve, gjykatësja Nadica Mitreska e shtyu seancën kryesore për 3 qershor të këtij viti.

Në seancën e sotme nuk mori pjesë as i akuzuari e as avokati i tij, Igor Petkoski.

Igor Petkovski, avokati i Ramiz Merkos, ka sqaruar që kërkesa për shtyrjen e seancës ishte për shkak se nuk i kishin marrë dëshmitë e Prokurorisë për shqyrtim.

Kryetari aktual i Komunës së Strugës që vjen nga radhët e BDI-së, Ramiz Merko, më 20 qershor u shpall si person non grata. Ai dyshohet për vepra të ndryshme rreth keqpërdorimit të pozitës zyrtare, si blerja e veturës zyrtare derisa komuna kishte xhirollogarinë e bllokuar dhe emërimi i drejtorit të shkollës në mënyrë të kundërligjshme.

Uashingtoni nuk do të lejojë hyrjen e tij në Shtetet e Bashkuara, për shkak të përfshirjes së tij në korrupsion të konsiderueshëm. Në njoftimin e Departamentit të shtetit thuhet se kryetar i komunës së Strugës, ka shpërdoruar fondet dhe ka ndërhyrë në procese gjyqësore dhe procese të tjera publike, duke dëmtuar besimin e publikut ndaj institucioneve demokratike të Maqedonisë së Veriut.