Prokuroria kërkoi paraburgim për të dyshuarit për sulmin në M-NAV, katër prej tyre u sollën në Gjykatën Penale

Prokuroria Themelore Publike urdhëroi zbatimin e procedurës hetimore kundër tetë personave për të cilat ka dyshime të bazuara se, si bashkautorë, kanë kryer veprën penale – rrezikim i sigurisë së trafikut ajror nga 303 paragrafi 2, në lidhje me nenin 22 të Kodit Penal, transmeton Portalb.mk.

“Të dyshuarit më 4 janar, me realizimin e veprimit të përbashkët, kanë kryer vepër penale me të cilën kanë rrezikuar sigurinë e Aeroportit të Shkupit, në mënyrë të kundërligjshme dhe me qëllim të kryerjes së veprës penale të dhunës ndaj një personi, kanë penguar shërbimet në aeroport. Me veprimet e tyre, ata kanë rrezikuar sigurinë e trafikut ndërkombëtar ajror në momentin kur në hapësirën ajrore mbi shtetit, po zhvilloheshin 28 fluturime nën kontrollin e M-NAV, me çka janë të dyshuar se kanë kryer vepër penale me të cilën parashikohet dënim me burg prej më së paku pesë viteve”, njoftojnë nga prokuroria.

Prokurori publik, i ka dorëzuar Gjykatës Penale propozim për përcaktimin e masës së paraburgimit për katër persona të dyshuar të cilët janë privuar nga liria, derisa po kërkohen edhe katër të tjerë, pasi vlerëson se ka rrezik për arratisje, mundësi që të dyshuarit të ndikojnë ndaj procedurës apo të përsërisin veprën.

Ndërkohë, nga Gjykata Penale në Shkup kanë konfirmuan për “360 shkallë”, se sonte (05.01.2024) janë sjellur në gjykatë katër persona që kanë lidhje me sulmin e djeshëm në M-NAV, gjatë së cilit disa persona dhe një i punësuar në M-NAV kanë hyrë në këtë institucion dhe kanë sulmuar të punësuar të tjerë.

Të dyshuarit u sollën me gjashtë vetura në Gjykatën Penale, mes tyre është Bekim Neziri.

Kronologjia e ngjarjeve

Sulmi i 4 janarit nga të dyshuarit në krye me Nezirin, në Navigacionin e Maqedonisë ndodhi pasi kryetari i Sindikatës së Kontrollorëve të Trafikut Ajror, Aleksandar Tasevski më 4 janar mbajti konferencë për shtyp së bashku me kontrolluesit e tjetë të fluturmeve, duke informuar se anëtarët e Sindikatës janë nën presion të shtuar nga menaxhmenti i M-NAV për shkak të kundërshtimit të sindikatës lidhur me shpalljen e fundit për punësime.

Nuk është hera e pare që Bekim Neziri sulmon të punësuarit në këtë institucion, ai në vitin 2010 ka rrahur edhe një kontrollor të trafikut ajror.

Ky incident, që konsiderohet si shumë i rëndë për faktin se bëhet për një nga institucionet më të rëndësishme të fluturimeve civile, ka bërë që Qeveria e RMV-së të njoftojë se në seancën e radhës, më 9 janar, t’i shkarkojë të gjitha strukturat drejtuese. Presidenti i shtetit, Stevo Pendarovski e ka përkrahur vendimin e Qeverisë ndërsa Sindikata pret që qeveria ta përmbushë premtimin e saj në të kundërtën më 10 janar do të mbyllet hapësira ajrore e vendit.

Nga ana tjetër, drejtori i Kontrollit të Fluturimeve Civile, Fahrudin Hamidi në konferencë për media më 5 janar, tha se “hapësira ajrore e Maqedonisë së Veriut është e sigurt” dhe se asnjëherë nuk ka qenë e rrezikuar. Ai theksoi se “personat që e kanë mbështetur grevën, janë të mashtruar nga kryetari sindikatës”, të cilin Hamidi e akuzon për “sabotim të punës” në kohën kur, sipas tij, ky institucion ka kaluar një krizë të rëndë financiare dhe është kompletuar me “kuadër të kualifikuar”.

Përplasjet në M-NAV filluan në dhjetor 2023, kur sindikata akuzoi menaxhmentin për punësime partiake. Shpalljet, siç deklaruan nga Sindikata e Kontrollorëve të Trafikut Ajror, janë joligjore, ndërsa personat që punësohen janë të përzgjedhur paraprakisht nga partitë politike. Ata disa herë kërkuan tërheqjen e shpalljeve, për të cilat drejtori Fahrudin Hamidi tha se ato shpallje janë “padyshim ndonjë gabim”.

Në faqen e Agjencisë së Punësimit u publikuan dy shpallje nga M-NAV, të cilat ishin për dy ditë nga 14 deri më 16 dhjetor dhe nga 15 deri më 17 dhjetor 2023, përkatësisht për “këshilltar të pavarur për çështje të personelit” dhe për “navigator të aviacionit”.

Për shpalljet në fjalë, Sindikata kërcënoi se do të hyjë në grevë gjatë periudhës së festave, mirëpo e njëjta u anulua “për disa arsye operacionale”.

• LEXO: Qeveria e RMV-së në seancën e ardhshme do të vendosë për shkarkimin e gjithë anëtarëve të Bordit drejtues  të M-NAV
• LEXO: Pa u penguar nga sigurimi, disa persona kanë sulmuar punonjësit e kontrolleve të fluturimeve, alarmoi kryesindikalisti, Policia po heton rastin
• LEXO: Pas ftesës në polici për kërcënim të dy drejtorëve të M-NAV, kryetari i Sindikatës paralajmëroi dorëheqje të kontrolluesve të fluturimeve
• LEXO: RMV, shefat e inxhinierëve në kontrollin ajror dhanë dorëheqje, pasi u punësuan kandidatë pa test përzgjedhjeje