Kovaçevski: ndryshimet kushtetuese do të miratohen, ndërsa ka sinjale se pro do të votojnë edhe deputetët e opozitës

By N. D. On 12/05/2023 09:26

Dimitar Kovaçevski, foto: Qeveria e RMV-së

Kryetari i LSDM-së dhe kryeministri Dimitar Kovaçevski thotë se ka sinjale konkrete se disa nga deputetët e opozitës do të votojnë për amendamentet kushtetuese, transmeton Portalb.mk..

“Unë do t’ju përgjigjem konkretisht se ka sinjale të caktuara nga disa prej këtyre deputetëve. Procedura ka nisur dhe do të vazhdojë. Amendamentet kushtetuese do të dorëzohen para verës. Nuk mund të dalim në qor-sokak sepse një ditë do të kemi 80 deputetë. Qytetarët tanë meritojnë të jetojnë në BE”, theksoi Kovaçevski në paraqitjen e mbrëmshmen në “Samo intervju” në televizionin Kanal 5.

Kovaçevski theksoi se Qeveria e udhëhequr nga LSDM arriti të sigurojë fillimin e negociatave dhe ta mbrojë gjuhën maqedonase në BE, nga histeria dhe gënjeshtrat e përhapura nga VMRO-DPMNE.

“Kemi përmbushur kushtet tona dhe kemi pasur negociata intensive dhe të vështira vitin e kaluar me presidencën franceze, me Bullgarinë fqinje. Në ato negociata rezultoi se kemi një numër të madh miqsh dhe mbështetësish dhe kemi marrë një kornizë negociuese me BE-në. Kornizë negociuese me të cilën kemi gjuhë të pastër maqedonase të konfirmuar përmes Frontex dhe një identitet të mbrojtur maqedonas. Në Shkup u përhap histeria kur u nënshkrua, u hodhën kokteje molotovi. Çështjet dypalëshe janë pjesë e protokollit dhe përmbushja e protokollit është në baza reciproke dhe vetëm në bazë të komisionit historik që vendos në mënyrë të pavarur, me 14 historianë. Aty të gjitha vendimet merren ekskluzivisht me konsensus”, tha Kovaçevski.

I pyetur nëse mendon se kjo do të jetë kërkesa e fundit nga Bullgaria, Kovaçevski tha se Maqedonia e Veriut po negocion me BE-në, jo me Sofjen.

“Ne i përmbushim detyrimet tona në kuadrin e negociatave. Një nga kushtet është përfshirja e pjesëve të tjera të kombeve në kushtetutën tonë. Do të hyjnë edhe malazezët dhe kroatët dhe hebrenjtë do të jenë propozim. Është hera e parë në histori që bllokada nuk vjen nga jashtë por nga brenda”, tha Kovaçevski, duke shtuar se e gjithë partia VMRO-DPMNE, të gjithë deputetët e asaj partie duhet t’i mbështesin ndryshimet kushtetuese.

I pyetur nëse do të ketë 80 deputetë në Kuvend që do të votojnë për amendamentet kushtetuese, Kovaçevski tha se është optimist racional.

“Kjo do të thotë se ne besojmë në arritjen e qëllimit, por unë punoj për ta arritur atë qëllim. Mirëpo varet nga vendimi i të gjithë deputetëve në kuvend sepse ua kanë borxh qytetarëve. Ata kanë mundësi të bashkohen në frontin evropian”, tha Kovaçevski

Kryeministri ritheksoi edhe një herë se zgjedhje të parakohshme nuk do të ketë.

Fillimisht do të ketë zgjedhje presidenciale, në gjysmën e dytë të marsit dhe pastaj në gjysmën e dytë të qershorit do të ketë zgjedhje parlamentare”, tha Kovaçevski.

Ndërkohë zëvendësministrja e Drejtësisë Viktorija Avramovska-Madiq pret që grupi punues për ndryshimet kushtetutese të përfundojë punën dhe të dorëzojë propozim deri në fund të muajit të ardhshëm.

Në paraqitjen e mbrëmshme në Tv 24, ajo theksoi se vendi ka nisur rrugën drejt BE-së, por për të vazhduar më tej, duhet të bëhen ndryshimet kushtetuese, siç është rënë dakord me kornizën e negociatave dhe skriningun.

“Vetëm amendamentet kushtetuese janë rruga drejt BE-së. Grupi punues është formuar më herët gjatë ditës së sotme nga ekspertë dhe përfaqësues të partive politike, të cilin Ministria e Drejtësisë e ka formuar për të përgatitur draft propozimin dhe nismën për hapjen e Kushtetutës. Në momentin kur ishte seancë konstituive me ministrin, shkuam, u dakorduam, filloi puna, u dorëzua vendim nga ana jonë dhe më pas i lamë të bënin gjithçka që do të bënin, metodologjinë, mënyrën, afatet, parimin e punës i lam që vetë të dakordohen. Rekomandimi ynë ishte që ta bënin sa më shpejt. Për një muaj duhet të paraqitet ai propozim dhe besoj se grupi punues prej 23 anëtarësh do të përgatisë gjithçka deri në fund të qershorit”, tha Avramovska-Madiq.

E pyetur se sa kompensim marrin anëtarët e grupit punues, Avramovska-Madiq tha se deri më tani asnjë nga 23 anëtarët ekspertë të grupit punues për përgatitjen e ndryshimeve kushtetuese nuk e ka përmendur.

“Të gjithë kanë ardhur me mirëbesim, nuk e kemi diskutuar. Nuk pyetën, as ne menduam se ishte prioritet me ministrin. Publiku do të njoftohet pasi të diskutojmë”, tha Avramovska-Madiq.

Ajo shtoi se nuk kishte ndjenjën se ekspertët Vllado Kambovski, Renata Treneska-Deskoska dhe Svetomir Shkariq do të refuzonin të marrin pjesë në grup edhe pse ishin të zgjedhur.

“Të tre pranuan dhe folën për këtë. Gjatë krijimit të këtij grupi, meqenëse nuk po shkruajmë kushtetutë, por po korrigjojmë një pjesë ku flitet për të drejtën ndërkombëtare dhe komunitetet etnike, nuk kam krijuar përshtypjen se ata nuk e kanë përkrahur ose refuzojnë të marrin pjesë”, tha zëvendësministrja.

Grupi punues për përgatitjen e propozim-iniciativës për nevojën e ndryshimeve kushtetuese me të cilat bullgarët dhe popujt e tjerë të përfshihen në aktin më të lartë juridik të shtetit, dje tha se në seancën e djeshme në Qeveri përfunduan diskutimin për Rregulloren e këtij organi dhe për të do të votohet të premten e ardhshme.

Në lidhje me njoftimet nga Ilindenska numër 2 se presin propozim-iniciativën për ndryshimet kushtetuese në Kuvend deri në fund të majit, kryetarja e grupit punues tha se nuk dëshiron të spekulojë me kohën.

Kryetarja e grupit punues, Margarita Caca Nikollovska, tha se nuk dëshiron të spekulojë me kohën sepse secili nga 23 anëtarët do të dëshirojë të thotë diçka, e gjitha duhet të shqyrtohet, të përmblidhet dhe varësisht nga e gjithë kjo do të vazhdojë edhe hartimi i një propozim-draft amendamenti.

Maqedonia e Veriut pas 17 vitesh me 19 korrik të vitit 2022 filloi bisedimet qasëse me BE-në me mbajtjen e konferencës së parë ndërqeveritare.

Kjo erdhi pas arritjes së propozimit francez në vend me 30 qershor të vitit të kaluar dhe miratimit të tij nga ana e Kuvendit të RMV-së për zgjidhjen e ngërçit Bullgari-Maqedoni e Veriut në drejtim të hapjes së rrugës eurointegruese për RMV-në.

Kujtojmë se negociatat me BE-në nuk do të fillojnë derisa të bëhen ndryshimet kushtetuese për përfshirjen e bullgarëve në Kushtetutë nga pala e Maqedonisë së Veriut, të cilat për votim në Kuvend kërkojnë dy të tretat e deputetëve, të cilat shumica nuk i ka, prandaj duhet mbështetje nga opozita maqedonase, ku VMRO–DPMNE ka paralajmëruar se nuk do të votojnë për ndryshimin e Kushtetutës.

Nëse nuk bëhen ndryshimet kushtetuese deri në nëntor të këtij viti, procesi eurointegrues i RMV-së rrezikon të bllokohet përsëri. Para heqjes së vetos, hapja e negociatave me Bashkimin Evropian për Maqedoninë e Veriut bllokohej vazhdimisht nga Bullgaria duke vendosur veto.

Ministria e Drejtësisë (MD)Ndryshime Kushtetuese RMV Parlamenti - Kuvendi i Maqedonisë së Veriut