Tetë muaj premtime, asnjë pikë asfalt: Komuna e Kumanovës e la në gropa rrugën në Zonën Industriale
Edhe pse Komuna e Kumanovës prej mbi tetë muajsh thotë se po përgatitet dokumentacioni për rikonstruksionin e rrugës “Zona Industriale”, ky institucion nuk përgjigjet në pyetjet gazetareske dhe injoron plotësisht nevojat dhe ankesat e qytetarëve. Ndërkohë, gjendja e rrugës përkeqësohet vazhdimisht, duke e bërë gjithnjë e më të vështirë lëvizjen për banorët dhe afaristët e kësaj zone, shkruan Portalb.mk.
Pavarësisht kërkesave dhe ankesave të vazhdueshme nga qytetarët, Komuna e Kumanovës prej mbi tetë muaj nuk arrin ta përgatisë dokumentacionin e nevojshëm për rikonstruksionin e rrugës në “Zonën Industriale”.
Portalb.mk e pyeti Komunën e Kumanovës nëse ka përfunduar dokumentacioni për projektin e rrugës “Zona Industriale” në Kumanovë dhe se kur pritet të fillojë rindërtimi i saj, por deri në publikimin e këtij teksti nuk morëm përgjigje.
Banorët dhe afaristët që punojnë në “Zonën Industriale” të Kumanovës tani më janë shprehur disa herë se mbulimi i gropave me shpenzimet e tyre nuk është zgjidhje afatgjate, pasi çdo reshje shiu i rikthen ato në gjendjen e mëparshme.
Edhe shoferët janë ankuar se shpesh janë të detyruar të ndjekin rrugë më të gjata për të shmangur dëmtimin e automjeteve nga gropat. Ata kërkojnë që kjo rrugë të riparohet sa më parë, pasi përdoret gjerësisht jo vetëm nga banorët e Kumanovës, por edhe nga ata të Komunës së Likovës.
Në tetor të vitit 2024 Komuna e Kumanovës theksoi se është porositur dokumentacioni për projektin e rrugës “Zona Industriale”.
Të njëjtën përgjigje e morëm edhe në prill të vitit 2025, ku theksuan se përgatitja e dokumentacionit është në proces. Nga kjo komunë nuk treguan se kur konkretisht do të jetë gati dokumentacioni dhe kur do të fillojnë punimet për këtë rrugë.
Kujtojmë që vitin e kaluar , banorët dhe afaristët që punojnë në rrugën “Zona Industriale” në Kumanovë, përmes një peticionit kërkuan nga Komuna e Kumanovës rikonstruimin e kësaj rruge. Por, e njëjta ishte refuzuar nga ata me arsyetimin se kjo rrugë nuk është pjesë e programit të tyre të vitit 2024 për ndërtim të rrugëve.