RMV, vetëm thirrjet raciste kundër shqiptarëve në fushat sportive nuk nxisin reagime të shpejta institucionale

By Xh. S. On 27/08/2025 13:53

Mosndëshkimi i thirrjeve raciste e antishqiptare në Kumanovë, gjatë ndeshjes së parakualifikimeve për Kampionatin Botëror të basketbollit mes Maqedonisë së Veriut dhe Rumanisë në Kumanovë, ngre dyshimin se edhe rasti i fundit në Kavadar, ku prap u dëgjua kënga “le ta kuptojnë shqiptarët e mallkuar…” rrezikon të mbetet si rast i pazgjidhur që kap pluhur në sirtarët e institucioneve përgjegjëse, shkruan Portalb.mk. Reagimi institucional, megjithatë nuk mungoi dhe ishte i shpejtë në rastin e shtetasit që valviti flamurin e “Shqipërisë së Madhe”, incident ky që ndodhi pas Kumanovës.

Rasti më i ri i gjuhës së urrejtejs në arenë sportive u regjistrua në Kavadar më 25 gusht në ndeshjen futbollistike Pelisteri – Shkupi. Njëjtë sikur një muaj më parë në Kumanovë edhe në Kavadar u dëgjua refreni i njohur tashmë “le ta kuptojnë shqiptarët e mallkuar, emri maqedonas nuk do të zhduket”.

Në pyetjen e Portalb.mk se a do të ndërmerr diçka prokuroria publike në lidhje me thirrjet raciste në Kavadar, nga prokuroria thanë se presin reagimin e policisë.

“Prokuroritë publike, në përputhje me juridiksionin e tyre ligjor, veprojnë dhe ndjekin penalisht të gjithë autorët e krimeve që janë identifikuar nga policia dhe për të cilët janë paraqitur kallëzime dhe janë siguruar prova se ata kanë kryer një krim”. thanë nga atje.

Në pyetjen e Portalb.mk se çfarë do të ndërmerr Ministria e Punëve të Brendshme, nga atje thanë se do të paraqesin kallëzim përkatës, duke mos treguar konkretisht se kur.

“Më 25.08.2025, nga ora 17:00 deri në orën 19:00, në stadiumin e qytetit në Kavadar, u luajt ndeshje kampionale futbolli midis KF “Pelister” nga Manastiri dhe KF “Shkupi” nga Shkupi. Para dhe gjatë ndeshjes, nuk u regjistruan shkelje të rendit dhe qetësisë publike dhe shkelje të tjera. Pas ndeshjes, kur lojtarët e KF “Pelister” u afruan për t’u përshëndetur me tifozët “Çkembari”, një pjesë e grupit të tifozëve Çkembari kreu veprën penale sipas Ligjit për Parandalimin e Dhunës dhe Sjelljes Joadekuate në Ndeshjet Sportive duke kënduar këngë që shkaktojnë dhe nxisin urrejtje në baza kombëtare. Departamenti i Policisë së Kavadarit po ndërmerr masa për të përcaktuar identitetin e autorëve, dhe kallëzim përkatës do të ngrihet kundër KF “Pelister”, në përputhje me ligjin”, kumtoi MPB.

Nga Federata e Futbollit të Maqedonisë së Veriut u zotuan se po ndërmarrin masa për zbardhjen dhe penalizimin e autorëve.

“Pas raportit të delegatit të ndeshjes KF Pelister – KF Shkupi, Komisioni për ndeshjet e FFM-së e ka dërguar KF Pelister në Komisionin Disiplinor për procedurë të mëtejshme. Raporti ka të bëjë me brohoritje fyese nga disa tifozë në ndeshjen Pelister – Shkupi, të luajtur në kuadër të raundit të 3-të të Ligës së Parë të Futbollit të Maqedonisë së Veriut,” thuhet në kumtesën e FFM-së.

Ndryshe nga procedurat e përmendura më lartë, u veprua shumë shpejtë në në identifikimin dhe penalizimin e një shtetasi gjerman për veprën “nxitje e urrejtjes, përçarjes ose intolerancës në baza kombëtare, racore, fetare dhe të tjera diskriminuese” sipas nenit 319 të Kodit Penal duke shfaqur dhe valëvitur flamurin e “Shqipërisë së Madhe” dhe me mbishkrimin “Autochthonous”. Gjykata Themelore Penale Shkup menjëherë shpalli vendim me të cilin e shpalli të pandehurin fajtor dhe e dënoi me dënim me kusht prej dy vitesh burg, i cili nuk do të ekzekutohet nëse personi i dënuar nuk kryen një krim të ri në 5 vitet e ardhshme. Njëkohësisht, meqenëse ai është shtetas i huaj, Gjykata vendosi ta dëbojë atë dhe t’i ndalojë hyrjen në vend për pesë vitet e ardhshme.

Thirrjet raciste ndaj shqiptarëve në Kumanovë nuk u zbardhën siç pretendon zëvendëskryeministri Izet Mexhiti

Duke komentuar rastin në Kavadar, ku kishim përsëri prezent shpërndarje të gjuhës së urrejtjes, thirrje antishqiptare, në një terren sportiv, zëvendëskryeministri i Maqedonisë së Veriut Izet Mexhiti tha se “individë të papërgjegjshëm do të ballafaqohen me ligjin siç u ballafaquan huliganët në Kumanovë dhe gjithkund tjetër”. Megjithatë, rasti në Kumanovë është pa epilog. Askush nuk është përgjigjur para ligjit, së paku jo deri më sot, shkruan Portalb.mk.

“Individë, ka pasur dhe do të ketë, të papërgjegjshëm, të cilët mundohen të vendosin njollë qeverisë së re. Pajtohemi se kjo nuk është as për së afërmi e as nuk mund të krahasohet me incidentet e burgosjet në të kaluarën. Këto individë të papërgjegjshëm do të ballafaqohen me ligjin siç u ballafaquan huliganët në Kumanovë dhe gjithkund tjetër”, tha zv/kryeministri Mexhiti.

Por, rasti në lidhje me thirrjet raciste në Kumanovë ende nuk është zbardhur, edhe pse ka rreth një muaj që ka ndodhur incidenti.

LEXO: Thirrjet antishqiptare në Kumanovë, rasti ende nuk është zbardhur

Kujtojmë se, mosreagimi adekuat i MPB, prokurorisë dhe lëndëve të pakta me aktgjykim në gjykatë, e ushqejnë edhe më shumë gjuhën e urrejtjes. Këtë e vërtetuan edhe ekspertët e komunikimit politik si dhe organizatat që merren me gjuhën e urrejtjes në analizën e Portalb.mk rreth temës në fjalë.

Federata e Futbollit RMV (FFM)Gjuha e urrejtjes Ministria e Punëve të Brendshme (MPB)Policia e Maqedonisë së Veriut Prokuroria Themelore Publike (PTHP) RMV Tifoz(e)