Pasaporta, letërnjoftimi dhe leja do të mund të merret edhe nesër në dy stacionet policore në RMV
Ministria për Punë të Brendshme në Maqedoninë e Veriut ka njoftuar që edhe nesër do të mund të merren dokumentet personale në dy stacione policore, transmeton Portalb.mk.
“Informojmë qytetarët se ditën e shtunë (13.01.2024) do të punojnë sportelet për dhënien e dokumenteve personale të gatshme në objektet e BEKO-së dhe MRTV-së në Shkup”, raportojnë nga Ministria.
Orari i punës për marrjen e këtyre dokumenteve do të jetë prej orës 08:00 deri në orën 16:00.
Ndryshe, të gjithë shtetasit e Maqedonisë së Veriut duhet të ndryshojnë dokumentet personale deri më 13 shkurt të vitit 2024. Ndryshimi i dokumenteve buron nga Marrëveshja e Prespës, e nënshkruar ndërmjet Maqedonisë së Veriut dhe Greqisë më 17 qershor 2018, e cila u dha fund mospajtimeve të kamotshme mes dy shteteve.
Neni 10 i Marrëveshjes së Prespës rregullon pjesën për përdorim ndërkombëtar të dokumenteve dhe për përdorim të brendshëm të tyre, por, që mund të përdoren edhe jashtë vendit siç janë: letërnjoftimi, pasaporta dhe patentë shoferi. Marrëveshja thekson dokumentet duhet të rinovohen në përputhje me emrin e ri dhe kushtet e specifikuara në nenin 1, paragrafi 3 i Marrëveshjes, jo më vonë se pesë vjet pas hyrjes në fuqi. Duke pasur parasysh se Marrëveshja ka hyrë në fuqi në shkurt 2019, dokumentet duhet të ndryshojnë në shkurt të vitit 2024.
Në mars të vitit të kaluar, letërnjoftimi prej 190 denarë është shtrenjtuar 310 denarë. Pasaporta për personat mbi 27-vjeç nga 1.500 në 2.000 denarë, ndërkaq patenta e shoferit prej 280 në 410 denarë.