MPB: Nga sot pas mesnate mos vozitni nëse keni patentë shoferi me emrin “Republika e Maqedonisë” (Infografik)
Ministria e Punëve të Brendshme i informon qytetarët se nga ora 00:00 të datës 13.02.2024, në pajtim me ndryshimet e miratuara ligjore, në lidhje me Marrëveshjen e Prespës, pushon vlefshmëria e dokumenteve të udhëtimit me emrin Republika e Maqedonisë dhe të vlefshme do të jenë vetëm dokumentet me emrin Republika e Maqedonisë së Veriut, transmeton Portalb.mk.
Rreth patentë shoferëve, MPB informon se nga ora 00:00 të datës 13 shkurt të vitit 2024 do të vlejnë patentë shoferët me emrin Republika e Maqedonisë së Veriut.
“Ministria e Punëve të Brendshme do të veprojë në pajtim me ligjin dhe për këtë apelojmë te qytetarët të mos drejtojnë automjetet nëse nuk kanë patentë shoferi valid me emrin Republika e Maqedonisë së Veriut. Gjithashtu paralajmërojmë se në rast të dëmit të shkaktuar gjatë aksidentit në trafik, qytetarët të cilët nuk posedojnë patentë shoferi do ti bartin pasojat rreth dëmit eventual”, thonë nga MPB.
Ministria apelon që qytetarët me dokumente të vjetra të udhëtimit assesi të mos tentojnë të dalin jashtë shtetit tonë për shkak se kjo nuk do të jetë e mundshme.
“Qytetarët me shtetësi të dyfishtë do të mund pa pengesa ti shfrytëzojnë dokumentet e shtetit tjetër. Në të njëjtë kohë, potencojmë se çdo qytetar i Republikës së Maqedonisë së Veriut i cili do të vij në pikëkalim kufitar për hyrje në shtetin tonë, do të pranohet pa marrë parasysh se me cilin dokument të udhëtimit do të vjen”, thotë MPB.
Në lidhje me letërnjoftimet, MPB informon se të njëjtit do të vazhdojnë edhe pas datës 13 shkurt, pa marrë parasysh se a janë me emrin Republika e Maqedonisë ose Republika e Maqedonisë së Veriut dhe qytetarët do të mund ti shfrytëzojnë në tërë territorin e shtetit tonë.
“Për dalje nga shteti, nga ana tjetër, nga shtetet me të cilat kemi marrëveshje dy palëshe për udhëtim me letërnjoftim, qytetarët nuk do të kthehen nga ana e nëpunësve policorë kufitarë nëse kanë letërnjoftim me emrin Republika e Maqedonisë, por nuk mund të garantojmë se të njëjtit do të pranohen nga shtetet tjera. E njëjta vlen edhe për lejet e qarkullimit të automjeteve, si për letërnjoftimet”, theksoi MPB.
Në lidhje me ngjitëset “NMK” në targat e regjistrimit, Ministria e Brendshme thekson se ato janë pa pagesë për qytetarët, kurse çdo lloj i keqpërdorimit rreptësishtë do të sanksionohet.
“Qytetarët mund në çdo stacion për kontrollim teknik të shkojnë me automjetin dhe lejen e qarkullimit dhe nga ana e kontrollorit të stacionit për kontrollim teknik do ti ngjiten ngjitëset në targat e regjistrimit”, thanë nga MPB.
Ndryshimi i dokumenteve buron nga Marrëveshja e Prespës, e nënshkruar ndërmjet Maqedonisë së Veriut dhe Greqisë më 17 qershor 2018, e cila u dha fund mospajtimeve të kamotshme mes dy shteteve.
Neni 10 i Marrëveshjes së Prespës rregullon pjesën për përdorim ndërkombëtar të dokumenteve dhe për përdorim të brendshëm të tyre, por, që mund të përdoren edhe jashtë vendit siç janë: letërnjoftimi, pasaporta dhe patentë shoferi. Marrëveshja thekson dokumentet duhet të rinovohen në përputhje me emrin e ri dhe kushtet e specifikuara në nenin 1, paragrafi 3 i Marrëveshjes, jo më vonë se pesë vjet pas hyrjes në fuqi. Duke pasur parasysh se Marrëveshja ka hyrë në fuqi në shkurt 2019, dokumentet duhet të ndryshojnë në shkurt të vitit 2024.
Për më tepër, zyrtarë të qeverisë në vitin 2018 deklaronin se qytetarët nuk do të kenë asnjë shpenzim shtesë dhe se dokumentet e udhëtimit do të ndryshohen pas skadimit të afatit të tyre.
Por, në mars të vitit të kaluar, letërnjoftimi prej 190 denarë është shtrenjtuar 310 denarë. Pasaporta për personat mbi 27-vjeç nga 1.500 në 2.000 denarë, ndërkaq patenta e shoferit prej 280 në 410 denarë.
- LEXO: Nëse jeni fotografuar për dokumente të reja kah fundi i dhjetorit, as mos u mundoni të prisni radhë për t’i marrë ato
- LEXO: Komiteti i Helsinkit: Po shkelen të drejtat e qytetarëve, shteti të gjejë zgjidhje për dokumentet personale
- LEXO: Shtetasit që nuk kanë pasaporta me emrin Maqedonia e Veriut pas 12 shkurtit do të qëndrojnë në shtëpi