Shqipëria brenda një muaji pritet të hap dy grupkapitujt e fundit në negociatat Shqipëri-BE

Burime për ABC News konfirmojnë se të martën e 16 shtatorit, Shqipëria do të ulet në konferencën e radhës me Bashkimin Evropian për çeljen e grupkapitullit “Agjenda e Gjelbër dhe Ndërlidhja e Qëndrueshme”.

Këto grupkapituj përfshijnë politikën e transportit që synon përmirësimin e infrastrukturës dhe sigurisë rrugore e hekurudhore, sektorin e energjisë dhe garantimin e furnizimit të qëndrueshëm dhe të përballueshëm me energji, mbrojtjen e mjedisit dhe përballimin e ndryshimeve klimatike, përmes standardeve të larta të BE-së, rrjetet trans-evropiane dhe ndërlidhjen infrastrukturore të Shqipërisë me vendet e BE-së, si pjesë e rëndësishme e Korridoreve Evropiane.

Më pas mbetet vetëm grupkapitulli i fundit i negociatave; “Burimet, Bujqësia dhe Kohezioni”, pozicioni negociues i të cilit u miratua pak ditë më parë në Kuvendin e Shqipërisë. Të njëjtat burime, thanë se data e diskutuar për këto grupkapituj është 2 tetori.  Kështu, Shqipëria hap të gjithë grupkapitujt e negocimit me Bashkimin Evropian.

Deri më tani janë çelur negociatat grupkapitujt e Themeloreve, Marrëdhëniet me Jashtë, Tregu i Brendshëm, Rritja dhe Konkurrueshmëria Gjithëpërfshirëse. Ambicia e qeverisë është që Shqipëria të bëhet anëtare me të drejta të plota brenda 2030 por komisionerja për Zgjerimin Marta Kos ka qenë optimiste për anëtarësimin e vendit tonë brenda 2029.