Shqetësime për cilësinë e ujit edhe në Krushevë dhe Leshkë, Filipçe kërkon kontrolle në të gjithë vendin
Ndërsa Gostivari vazhdon të përballet me krizën e ujit të pijshëm dhe epideminë e gastroenteritit, shqetësimet për cilësinë e ujit janë zgjeruar edhe në qytete të tjera. Në Krushevë është konstatuar ujë bakteriologjikisht i papërshtatshëm për pije, ndërsa kryetari i LSDM-së, Venko Filipçe, pretendon se ujë i pasigurt është regjistruar edhe në Spitalin për Sëmundje të Mushkërive në Leshkë, duke kërkuar kontrolle të jashtëzakonshme në të gjitha sistemet e ujësjellësit në vend, transmeton Portalb.mk.
Ndërmarrja Publike “Komuna” nga Krusheva, duke iu referuar informacioneve të marra nga Qendra për Shëndet Publik – Prilep, njoftoi se uji në Krushevë është bakteriologjikisht i papërshtatshëm, ndaj u rekomandon banorëve që për pije të përdorin ujë të ambalazhuar.
“Gjithashtu, gjatë analizave të burimeve publike të ujit te pompa e derivateve dhe te ‘Shën Petka’, mostrat e marra më 20 korrik kanë rezultuar bakteriologjikisht të papërshtatshme, prandaj këto burime nuk guxojnë të përdoren si ujë për pije”, thuhet në njoftimin e ndërmarrjes.
Sipas NP “Komuna”, uji nga ujësjellësi i qytetit mund të përdoret për higjienë personale, përgatitjen e ushqimit, larjen e rrobave dhe enëve vetëm pasi të vlohet për të paktën 10 minuta.
“Gjithashtu, informojmë se uji klorohet rregullisht dhe çdo ditë kryhen kontrolle për praninë e klorit. Këto rekomandime do të mbeten në fuqi deri në marrjen e tre mostrave radhazi që rezultojnë të rregullta”, theksojnë nga ndërmarrja.
Nga NP “Komuna” shtojnë se Qendra për Shëndet Publik – Prilep do të jetë në komunikim të vazhdueshëm me institucionet kompetente dhe do t’i informojë rregullisht banorët e Krushevës për zhvillimet e mëtejshme.
Në të njëjtën kohë, kryetari i LSDM-së, Venko Filipçe, publikoi dokumente të Qendrës për Shëndet Publik – Tetovë, për të cilat tha se dëshmojnë se në Spitalin për Sëmundje të Mushkërive në Leshkë është konstatuar ujë i papërshtatshëm për pije.
“Raporti për testimin e sigurisë së ujit është nga një mostër e marrë në Spitalin për Sëmundje të Mushkërive në Leshkë. Data e përfundimit të analizës është 13 maji. Numri i përgjithshëm i baktereve koliforme në 100 mililitra ujë është 51. Mostra është marrë nga një çezmë në spital ku trajtohen pacientë. Pra, 51 baktere koliforme në 100 mililitra ujë, ndërsa në raport thuhet se uji nuk i plotëson standardet e cilësisë për ujë të pijshëm. Dhe kjo ka ndodhur në spitalin e Leshkës në fund të majit, por askush nuk ka reaguar. A e dinë këta njerëz çfarë po bëjnë? Çfarë lloj menaxhimi është ky i një institucioni?”, tha Filipçe.
Në konferencën për media, Filipçe theksoi se një papërgjegjësi e tillë e pushtetit rrezikon drejtpërdrejt shëndetin e qytetarëve dhe kërkoi reagim urgjent nga institucionet kompetente.
“Cili është qëllimi? Të rrezikohet shëndeti i të gjithë qytetarëve në vend? Kërkojmë mbikëqyrje të jashtëzakonshme dhe analiza të të gjitha stacioneve të furnizimit me ujë në vend. Të publikohen rezultatet e analizave fizike – turbullira, aroma dhe parametrat e tjerë, analizat kimike – nitratet, nitritet dhe amoniaku, si dhe analizat mikrobiologjike dhe të dhënat për klorimin”, deklaroi Filipçe.
Ndërkohë, partia DOM reagoi duke paralajmëruar për rreziqe të tjera të mundshme ndaj burimeve të ujit në vend. Duke iu referuar krizës në Gostivar, nga partia thanë se rasti tregoi pasojat e mosveprimit institucional dhe kërkuan zgjidhje urgjente për deponinë e ish-kombinatit “Jugohrom” në Jegunovcë. Sipas tyre, kromi gjashtëvalent nga deponia paraqet kërcënim të drejtpërdrejtë për burimin Rashçe, nga i cili furnizohet me ujë të pijshëm Shkupi. DOM u bëri thirrje institucioneve të veprojnë në mënyrë parandaluese dhe të ndërmarrin të gjitha masat e nevojshme për mbrojtjen e burimeve ujore, duke theksuar se uji i pijshëm është interes strategjik dhe se mbështesin edhe nismën qytetare “Shpëtim për burimin Rashçe”.
“Sistemi duhet më në fund të veprojë në mënyrë parandaluese, sepse kërcënimi nga kromi gjashtëvalent ndaj burimit Rashçe përbën rrezik të drejtpërdrejtë për furnizimin me ujë të pijshëm të kryeqytetit. Pse kjo është alarmante? Kromi gjashtëvalent është një substancë kimike jashtëzakonisht toksike dhe ancerogjene. Burimi Rashçe është burimi kryesor i ujit të pijshëm për të gjithë Shkupin. Një reagim pas ndodhjes së dëmit do të nënkuptonte një katastrofë për qindra mijëra qytetarë. Institucionet duhet të ndërmarrin të gjitha masat e nevojshme, sepse uji i pijshëm është interesi strategjik numër një. Shkupit i duhet ujë i sigurt për pije, para se të jetë tepër vonë. E drejta për ujë të pastër kërkon vigjilencë të vazhdueshme dhe luftë të përbashkët. hprehim mbështetje të plotë edhe për nismën “Shpëtim për burimin Rashçe”. Kur bëhet fjalë për mbrojtjen e burimeve tona natyrore, zëri i qytetarëve dhe veprimi politik duhet të ecin krah për krah”, thuhet në Reagim.
Ndryshe, në Gostivar është shpallur epidemi të problemeve gastrointestinale, pas paraqitjes së numrit të lartë të i qytetarëve me simptoma si diarre, të vjella dhe dehidratim.
Kujtojmë se me propozim të Prokurorisë, Gjykata Penale në Gostivar shqiptoi 30 ditë paraburgim për tre të dyshuarve për ndotjen e ujit në sistemin e ujësjellësit në Gostivar. Gjykatësja Dragoslada Veselinova tha se duke pasur parasysh dënimin e paraparë me ligj që iu ngarkohet të dyshuarve sanksionohet me të paktën 4 vjet burg, ndërsa, shtoi ajo nëse lihen të mbrohen në liri, ekziston rreziku që ata të arratisen ose të ndikojnë te dëshmitarët.
Inspektorët e Agjencisë për Ushqim dhe Veterinari, së bashku me policinë dhe përfaqësues të Ministrisë së Mjedisit, konstatuan se në tubacionin kryesor ishte vendosur në mënyrë të paligjshme një pompë që fuste drejtpërdrejt ujë nga lumi Vardar. Kontrolli u krye pas njoftimit të prokurorit publik për shkak të dyshimeve se uji ishte ndotur, pas ankesave të qytetarëve. Më pas, uji u ndalua për pirje.
Prokuroria Publike më 20 korrik shpalli rezultatet e analizave, të cilat treguan se në ujë kishte pasur 48 herë më shumë baktere se vlerat e lejuara.