Seanca e Komisionit hetimor: Lëvizja “Kush është i radhës?” më 6 dhjetor do të mbajë takim me qytetarët nga të cilët pret propozime që do t’u paraqiten deputetëve

Lëvizja protestuese “Kush është i radhës?” do të marrë pjesë në seancën e Komisionit të Përhershëm Hetimor për Mbrojtjen e Lirive dhe të Drejtave të Qytetarëve, të cilën Parlamenti e ka caktuar për 9 dhjetor 2025. Pika e vetme në rend të ditës do të jetë peticioni i paraqitur nga shoqata e prindërve nga Koçani “16 Marsi”, me të cilin ata kërkojnë vendosjen e përgjegjësisë politike dhe ndryshime në zgjidhjet ligjore me qëllim parandalimin e tragjedive të këtij lloji në të ardhmen, transmeton Portalb.mk.

Përpara seancës, lëvizja “Kush është i radhës?” njoftoi se do të mbajë takim publik online të shtunën, më 6 dhjetor, në orën 18:00.

“Në këtë prezantim, ne duam të përfshijmë pikëpamjet dhe kërkesat e sa më shumë njerëzve dhe të jemi zëdhënës të popullit të Maqedonisë, i cili vazhdimisht neglizhohet, injorohet dhe manipulohet nga institucionet që duhet ta përfaqësojnë atë. Të gjitha propozimet dhe vërejtjet e marra do të sistematizohen dhe do t’u paraqiten deputetëve dhe të gjithë të pranishmëve në seancë”, tha Kush është i radhës.

Sipas lëvizjes, i gjithë procesi duhet të jetë transparent, gjithëpërfshirës dhe i fokusuar në vendosjen e përgjegjësisë politike, si dhe në përmirësimin e mekanizmave për mbrojtjen e të drejtave civile.

“Zëri i të gjithëve neve duhet të ketë vendin e tij në proceset institucionale, veçanërisht kur bëhet fjalë për çështje që lidhen me sigurinë, përgjegjësinë politike dhe punën e autoriteteve kompetente. Është përgjegjësia jonë të sigurohemi që çdo mendim përkatës të dëgjohet dhe të përçohet me saktësi”, tha lëvizja.

Tetë muaj pas aksidentit, 37 të pandehur u ulën në bankën e të akuzuarve, nga të cilët 34 ishin individë dhe tre ishin persona juridikë. Pronarë baresh, menaxherë, inspektorë, roje sigurie, nëpunës civilë dhe ish-kryetarë bashkie janë akuzuar.

Familjet e 63 viktimave të zjarrit në diskotekën e Koçanit “Puls” kërkojnë drejtësi për jetën e ndërprerë të të dashurve të tyre dhe për dhimbjen e shkaktuar të lënduarve dhe të gjithë atyre që u prekën nga ngjarja tragjike.

Zjarri në Koçan shpërtheu natën e 15-16 marsit, duke rezultuar me 63 viktima dhe duke plagosur pothuajse 200 të tjerë. 

• LEXO: Të akuzuarit mohuan përgjegjësinë për zjarrin në Koçan, prindërit e viktimave presin procedurë të shpejtë dhe objektive
• LEXO: Pronari i “Pulse” shpërtheu në lot në sallën e gjyqit: Nëse do ta dija që kishte lëshime në kabare, do t’i kisha rregulluar
• LEXO: Prova kaotike, aktakuzë e re dhe materiale të padërguara, mbrojtja në rastin “Puls” me vërejtje të shumta ndaj prokurorisë
• LEXO: Vazhdon gjykimi për zjarrin në Koçan, priten deklarimet për fajësi dhe fjalët hyrëse të mbrojtjes 
• LEXO: Tragjedia e Koçanit, Prokurori: Nëse diskoteka Pulse do t’i plotësonte kushtet, 63 personat nuk do të kishin vdekur