RMV, sot ekipi i BE-së do të nisë misionin vlerësues për punën e Këshillit Gjyqësor

By N. D. On 27/07/2023 10:00

Flamuri evropian, Foto: Fisnik Xhelili/Portalb.mk — Flamuri i BE-së Foto: Fisnik Xhelili/Portalb.mk

Siç njoftoi së fundmi ambasadori David Geer, shef i Delegacionit të Bashkimit Evropian, Komisioni Evropian po dërgon një mision vlerësues në Maqedoninë e Veriut për t’u fokusuar në funksionimin e Këshillit Gjyqësor, transmeton Portalb.mk.

“Një ekip ekspertësh nga shtetet anëtare të BE-së do të shqyrtojë kuadrin institucional të Këshillit Gjyqësor dhe do të propozojë masa afatshkurtra dhe afatmesme, duke përfshirë masa legjislative dhe institucionale, me qëllim që të forcohet pavarësia, paanshmëria dhe besueshmëria e këtij organi të rëndësishëm menaxhues për gjyqësorin”, deklarojnë nga Delegacioni i BE-së në Shkup.

Udhëheqësi i ekipit, Branko Hrvatin, ish-kryetar i Gjykatës Supreme të Kroacisë, do të vizitojë Maqedoninë e Veriut sot dhe nesër për të nisur misionin, duke identifikuar qëllimin e punës së ekipit. Puna do të përfundojë me mbështetjen e një ekipi ekspertësh nga shtetet anëtare të BE-së, të cilët do të vizitojnë Maqedoninë e Veriut në shtator 2023.

Euroambasadori Dejvid Gir këtë e paralajmëroi më 5 korrik në emisionin Top Tema në TV Telma. Giri sqaroi që tashmë kjo i është propozuar Qeverisë së Maqedonisë së Veriut dhe shpreson se do të realizohet sa më shpejtë që është e mundur. Ai theksoi që duhet të korrigjohet puna e Këshillit Gjyqësor.

“Mendoj se turbulenca është fjala e duhur për këtë. Ne po e ndjekim këtë nga afër me shumë shqetësim. Këshilli Gjyqësor duhet të luajë një rol shumë të rëndësishëm. Ai duhet të mbrojë dhe promovojë pavarësinë, profesionalizmin dhe integritetin e gjyqësorit. Kjo është puna e tij. Është e qartë se nuk e bën këtë. Dhe atë që kemi parë së fundmi është vërtet. Zhvillimet e fundit janë shumë shqetësuese. Aq sa për këtë arsye i kemi propozuar Qeverisë që të sjellë këtu një mision vlerësimi të nivelit të lartë për Këshillin Gjyqësor, për të gjetur mënyrat se si t’i përgjigjemi pyetjeve për profesionalizmin, integritetin dhe pavarësinë, në mënyrë që ata të mund të kryejë punën e tyre në të ardhmen”, thotë Gir.

Ai sqaron se ai është grup këshilldhënës, mision vlerësues. Gir theksoi nevojën për sundimin e ligjit dhe rolin e Këshillit Gjyqësor.

Këshilli Gjyqësor më 4 maj, në seancën pas orarit të punës, të cilin e njoftoi në ueb-faqen e tij pak para fillimit, me tetë vota për kryetar të ri zgjodhi Sashko Georgiev.

Megjithatë, para kësaj, këshilli mbajti dy seanca të fshehta – në orën 13:30 dhe në orën 14:00. Në të parën votoi tërheqjen e vendimit fillestar për shkarkimin e Damevës. Më pas, i dyti me nëntë vota ka votuar mosbesimin dhe e ka shkarkuar. Vendimet për mbajtjen e seancave të mbyllura nga Këshilli Gjyqësor u arsyetuan me një dispozitë të ligjit që parashikon se publiku mund të përjashtohet për të mbrojtur reputacionin dhe integritetin e gjyqtarit ose kandidatit për gjyqtar. Mirëpo në dy seancat me dyer të mbyllura nuk është diskutuar fare për gjyqtar apo kandidat për gjyqtar.