“Qyteti i Gjelbër Human” do të formojë parti politike, sepse është e vetmja mënyrë që të pavarurit të marrin pjesë në zgjedhje

Iniciativa Qytetare “Qyteti i Gjelbër Human” do të formojë parti, sepse kjo është e vetmja mënyrë që të pavarurit të marrin pjesë në zgjedhjet e ardhshme lokale. Ky hap nga nisma qytetare po ndërmerret, sepse partitë kryesore nga qeveria dhe opozita vitin e kaluar miratuan së bashku ndryshime në Kodin Zgjedhor që rrisin pragun e nënshkrimeve të kërkuara për pjesëmarrjen e tyre në zgjedhje, transmeton Portalb.mk.  

Kjo zgjidhje ligjore u shfuqizua nga Gjykata Kushtetuese në mars të këtij viti, por që atëherë nuk është miratuar asnjë zgjidhje e re, partitë shmangin të flasin për këtë çështje, kështu që pjesëmarrja e iniciativave qytetare në zgjedhje po vihet në pikëpyetje. 

“Qyteti i Gjelbër Human” është i vetmi grup i këshilltarëve në Këshillin e Qytetit të Shkupit që nuk mbështetet nga partitë politike, por nga 23 organizata të shoqërisë civile, dhe ka dy këshilltarë, Dragana Velkovska dhe Gorjan Jovanovski. 

“A duam parti? Jo, aspak. Por, as që duam të tërhiqemi tani, kur partitë po përpiqen me forcë dhe në çdo mënyrë të na ndalin. Duhet të vazhdojmë betejën që 10,000 banorë të Shkupit e mbështetën në zgjedhjet e fundit lokale. A kemi alternativë? Jo, aktualisht, ligjërisht, mund të formojmë parti ose të ngremë flamurin e bardhë. Dhe ngritja e flamurit të bardhë është e kundërta thelbësore e ekzistencës sonë, shpirtit luftarak qytetar dhe gjithçkaje tjetër që përfaqësojmë”, thanë nga “Qyteti i Gjelbër Human” dhe u bënë thirrje qytetarëve për mbështetje. 

Nevojiten 1,000 nënshkrime për të formuar një parti. 

Në përgjigje të pyetjes së një gazetari dje në një konferencë për media në zyrën e tij, kryetari i kuvendit, Afrim Gashi, tha se kjo çështje do të duhet të zgjidhet, por ai vetë nuk e di se si dhe kur partitë parlamentare do të kenë guximin ta miratojnë ligjin. 

Ai thotë se kjo çështje është në pritje dhe nëse nuk zgjidhet para pushimeve, do të duhet të zgjidhet menjëherë pas ditëve të pushimit. 

“Gjykata Kushtetuese urdhëroi miratimin e një Kodi të ri Zgjedhor pasi në mars shfuqizoi nenet që kërkonin që kandidatët e pavarur të merrnin një numër më të madh nënshkrimesh për të kandiduar në zgjedhje, por tani, në fund të korrikut, kushtet për miratimin e normave të reja nuk janë përmbushur. Pati marrëveshje nga partitë kryesore, ndërsa BDI dhe “E Majta” e kundërshtuan. Nëse nuk votojmë për të deri në fund të këtij muaji, nuk e di se çfarë do të bëhet, por kemi folur në takimet koordinuese të grupeve parlamentare se Kodi Zgjedhor është një çështje që duhet ta zgjidhim. Do ta miratojmë pas festave”, tha kryetari i parlamentit. 

Në zgjedhjet lokale të vitit 2021, kandidatët e pavarur fituan vende në deri në 33 komuna, ose 41% të të gjitha komunave në Maqedoni dhe Qytetin e Shkupit, dhe me mbi 56,000 vota, ata ishin forca e katërt më e madhe politike në vend. 

Nëntë iniciativa qytetare kanë luftuar me institucionet për një vit të tërë, pasi qeveria dhe opozita vitin e kaluar miratuan ndryshime në Kodin Zgjedhor që rritën pragun e nënshkrimeve të kërkuara për të pavarurit për të marrë pjesë në zgjedhje. Iniciativat qytetare “Shansi për Qendër”, “Qytet i Gjelbër Human”, “Të Pavarurit për Karposhin”, “Ndryshe” nga Manastiri, “Të Gjelbrit” nga Gazi Baba, “Më Mirë për Tetovën” dhe “Mjaft” nga Strumica, Novo Sello dhe Bosilova kërkojnë që për listat e kandidatëve të pavarur të vendoset një kusht prej 20 deri në 100 nënshkrime të mbledhura dhe 200 nënshkrime të mbledhura për Qytetin e Shkupit, duke ndjekur shembullin e shumë vendeve evropiane.

Gjithashtu kërkohet të lejohet mbledhja e nënshkrimeve në terren dhe jashtë zyrave të KSHZ-së, si në vendet evropiane, të rritet periudha e mbledhjes së nënshkrimeve në 30 ditë, të lejohet që emri i listave të këshilltarëve të pavarur të renditet i plotë në fletëvotim, dhe jo vetëm emri i bartësit si më parë, të sigurohet barazia midis të gjithë aktorëve politikë në përcaktimin e renditjes së listës së vetme të kandidatëve për zgjedhjen e presidentit, anëtarëve të parlamentit, anëtarëve të këshillit ose kryetarit të komunës, me anë të hedhjes së shortit, dhe të ndryshohet dispozita për qasjen në hapësirën mediatike dhe financimin e fushatës zgjedhore. 

Të qarta janë datat, por jo edhe rregullat sa i përket ndryshimeve të Kodit Zgjedhor për të cilat partitë politike janë bërë lëmsh sepse duhet të votohen me shumicë Badinteri. Propozim-ligjin e parë ua rrëzoi Gjykata Kushtetuese.  Aktualisht ndryshimet e Kodit Zgjedhor ndodhen në lexim të dytë në Kuvendin e RMV-së.

• LEXO: Gashi nuk e di se kur ose si do të zgjidhet pjesëmarrja e kandidatëve të pavarur në zgjedhje
• LEXO: Organizatat qytetare në RMV kërkojnë që për kandidimin e këshilltarëve të pavarur kushti të jetë nga 20 deri më 100 nënshkrime
• LEXO: Nismat qytetare në RMV kundër Mickoskit në lidhje me ndryshimet në Kodin Zgjedhor