Kryetari i Tetovës, Kasami u thirr në Gjykatën e Tetovës në lidhje me organizimin e pritjes së kryeministrit Kurti
Më 15 shtator të këtij viti, kryetari i Komunës së Tetovës, Bilall Kasami, do të merret në pyetje në Gjykatën e Tetovës në lidhje me organizimin e pritjes së kryeministrit të Tetovës më 11 gusht, transmeton Portalb.mk.
Në lidhje me këtë ftesë, ka reaguar kryetari Kasami, duke paralajmëruar pushtetin që koha e tyre ka përfunduar, duhet t’i numërojnë ditët.
“Edhe një tentim për frikësim dhe heshtje, që më bën të kuptoj se sa frikë e kanë opozitën shqiptare. Me këto akte, po na e shtoni kurajon. Po e përsëris, koha e frikësimit dhe shantazhimit të shqiptarëve ka vdekur, ashtu siç është duke vdekur regjimi juaj. I detyrohemi vetëm qytetarëve dhe këtij populli, sa për regjimet e këtilla, nuk jemi frikësuar as në kohën e komunizmit, as tani”, ka shkruar Kasami.
Në ftesë theksohet që në rast se i thirruri nuk paraqitet në ditën e caktuar, duke mos e arsyetuar mosardhjen, do të urdhërohet shoqërimi i tij.
Kujtojmë se më 11 gusht kryeministri i Kosovës u prit në Komunën e Çairit dhe atë të Tetovës. Pas kësaj pati shumë reagime nga politikanët e vendit. Pak ditë pas ceremonive të pritjes së kryeministrit të Kosovës – Albin Kurtit, në stacion policor janë ftuar dy nikoqirët, kryetari i Çairit – Visar Ganiu dhe ai i Tetovës – Bilall Kasami.
Kryeministri i vendit doli me qëndrimin kundër mënyrës së manifestimit në shesh të Tetovës, ku aty u pa të valëvitej një flamur me hartën e Shqipërisë së Madhe. Nga kabineti i Dimitar Kovaçevskit dënuan faktin se në ngjarje nuk është intonuar himni shtetëror i RMV-së dhe nuk është shfaqur flamuri shtetëror. Nga atje njoftuan se nuk janë dakord as me ndryshimin e emrit të rrugës në Çair nga “Brigada e Dytë e Maqedonisë” në “Adem Demaçi”.
Në reagimin e presidentit Stevo Pendarovski thuhej se organizatorët e tubimeve publike në Tetovë dhe Çair duhet të ndëshkohen me ligj për shkelje të dispozitave ligjore lidhur me përdorimin e flamurit dhe himnit të shtetit dhe flamujve dhe simboleve të bashkësive, me injorim të plotë të simboleve të shtetit. Mënyra e realizimit të idesë për riemërim të rrugës në Komunën e Çairit, thuhet në reagimin nga Pendarovski, është në kundërshtim me parimet e debatit demokratik dhe respektim të trashëgimisë historike të të gjithë bashkësive në shtet.
Reagoi edhe partia opozitare VMRO-DPMNE nga ku theksuan se institucionet nuk mund të arsyetohen me vizita private dhe se partia në pushtet – LSDM e gjunjëzoi sërish Maqedoninë e Veriut.
Nga ana tjetër, partitë opozitare shqiptare akuzuan palën maqedonase se me këtë qasje rikthejnë histerinë antishqiptare nga periudha e komunizmit.
- LEXO: Kasami dhe Ganiu u ftuan në polici pas pritjes së Kurtit
- LEXO: Vjosa Osmani për flamurin e Shqipërisë së Madhe: Lëvizje e një qytetari dhe jo si diçka të organizuar, RMV-ja është ndër fqinjët më të çmuar
- LEXO: Vizita e Kurtit shpërfaqi ndasitë etnike në Maqedoninë e Veriut
- LEXO: RMV, opozita e bashkuar ka mbështetje nga kryeministri i Kosovës Kurti, deklaroi Kasami
- LEXO: Reagim i presidentit Pendarosvki me rastin e vizitës së Albin Kurtit në Tetovë dhe Çair
- LEXO: Kovaçevski dhe Dimitrievski dolën kundër mënyrës së manifestimit në Tetovë për Albin Kurtin
- LEXO: Kurti në Tetovë: Maqedonia e Veriut sa më afër Kosovës, Shqipërisë dhe Bullgarisë, dhe sa më larg Serbisë, më afër BE-së