Komuna e Tetovës e bllokoi në Facebook një qytetar, i cili kritikoi një postim, KPMD konstatoi se është diskriminuar
Komisioni për Parandalimin dhe Mbrojtjen nga Diskriminimi (KPMD) ka përcaktuar se Komuna e Tetovës diskriminon arkitektin Boshko Vidoeski, të cilin e bllokoi nga faqja zyrtare në Facebook nëntorin e kaluar për shkak të një komenti kritik. Vidoeski komentoi në një postim në të cilin Komuna mburrej me gjetjet që përmendnin Tetovën në Raportin e Komisionit Evropian mbi progresin e Maqedonisë drejt anëtarësimit në BE. Ai vuri në dukje se këto gjetje u paraqitën në një mënyrë manipuluese, dhe ata që ishin përgjegjës për marrëdhëniet me publikun në Komunën e Tetovës gjetën një zgjidhje – ta bllokonin dhe ta pengonin të vinte re më manipulime të tilla, dhe të gjithë të tjerët t’i lexonin ato, transmeton Portalb.mk.
“Komisioni Evropian e përmend Komunën e Tetovës vetëm si një nga komunat që përfunduan të ashtuquajturin “kadastër të gjelbër”. Për ata që nuk e dinë, kjo do të thotë vetëm inventarizim, hartëzim, regjistrim të ndotësve të ajrit, më shpesh në shërbim të një baze dokumentimi për planifikimin urban dhe ndërmarrjen e hapave të mundshëm në të ardhmen për të zgjidhur problemin e ndotjes. Dhe kaq. Komisioni Evropian në raportin e tij nuk i ka dhënë asnjë vlerësim të lartë Komunës së Tetovës, as nuk e ka përmendur rritjen e famshme të sipërfaqeve të gjelbra, përmirësimin e famshëm të cilësisë së ajrit dhe krijimin e famshëm të një mjedisi më të shëndetshëm jetësor për qytetarët, siç mburreni në këtë postim! Jemi bërë një parking i madh me grumbuj ndërtesash të reja, e ju këtu po propagandoni budallallëqe, ka njerëz në Tetovë që lexojnë dhe kuptojnë, jo të gjithë janë aq budallenj sa mendoni ju”, shkruhej në koment, i cili u fshi nga faqja e Facebook-ut e Komunës së Tetovës në momentin kur Vidoeski u bllokua.
Vidoeski paraqiti ankesë për diskriminim në Komisionin për Parandalimin dhe Mbrojtjen nga Diskriminimi, i cili tani ka lëshuar mendim duke përcaktuar diskriminimin në bazë të bindjeve politike dhe duke rekomanduar që Komuna të zhbllokojë Vidoeskin, pra t’i lejojë atij qasje në faqen e Facebook-ut.
“Pas shqyrtimit të pretendimeve në ankesë dhe shtojcën e paraqitur, si dhe deklaratës së Komunës së Tetovës në lidhje me problemin që është shfaqur, Komisioni për Parandalimin dhe Mbrojtjen nga Diskriminimi konkludon se në këtë rast të veçantë është kryer diskriminim në bazë të bindjeve politike në fushën e informimit publik dhe mediave nga Komuna e Tetovës, për arsye se pas publikimit të komentit të tij negativ në lidhje me një temë të caktuar që u publikua në faqen e Facebook-ut të komunës, denoncuesit iu pamundësua qasja në faqe. Në këtë mënyrë, me këtë veprim të Komunës, denoncuesit i pengohet të informohet për aktivitetet, si dhe të shprehë lirisht mendimin dhe qëndrimin e tij në lidhje me ngjarjet dhe aktivitetet që lidhen me Komunën në të cilën jeton për shkak të kufizimit, përjashtimit dhe trajtimit të pabarabartë të tij”, thuhet në dokumentin nga KPDM, të cilin e ka parë “Sloboden Peçat“.
Komisioni rekomandon që Komuna t’i sigurojë Vidoeskit qasje në faqen zyrtare të Facebook-ut, dhe nëse nuk e bën këtë brenda 30 ditëve të ardhshme, do të pasojë procedurë kundërvajtjeje.
Ndryshe, në Raportin e Progresit të Komisionit Evropian për Maqedoninë e Veriut, Komuna e Tetovës përmendet vetëm një herë edhe atë për përfundimin e kadastrës së ndotjes së ajrit, pa asnjë vlerësim apo lavdërim për politikat mjedisore. Tetova ka vazhdimisht ajër të ndotur dhe nuk ka park e as hapsira të gjelbra për t’u lavdëruar.
Kujtojmë se viti 2025 filloi me ndotje enorme të ajrit në Tetovë. Ky qytet shpesh është gjendur në top listat botërore për nga ndotja e ajrit.
Që problemi nuk po zgjidhet me vite, këtë e tregojnë shifrat e ndotjes, të cilat çdo vit gjatë muajve nëntor, dhjetor, janar dhe shkurt arrijnë kulmin.
Në programin e kaluar zgjedhor të kryetarit të Komunës së Tetovës Bilall Kasamit, me të cilin ai erdhi në krye të komunës, u parapanë disa masa për ruajtjen e natyrës dhe të mjedisit. Megjithatë, përveç disa aktiviteteve simbolike, shumica e këtyre premtimeve nuk u përmbushën.