I është caktuar paraburgim tetëditor personit që dëmtoi xhamin e derës hyrëse të ambasadës bullgare në Shkup
Gjykatësi paraprak ka caktuar paraburgim tetëditor për 55-vjeçarin e dyshuar për dëmtimin e xhamit në derën hyrëse të ambasadës bullgare në Shkup, konfirmoi sot Gjykata Themelore Penale e Shkupit. Paraburgimi u caktua me propozim të Prokurorisë Themelore Publike të Shkupit, e cila dje filloi procedurë kundër personit që ndiqet penalisht për veprën penale të dëmtimit të pronës së të tjerëve, transmeton Portalb.mk.
Prokuroria kërkoi që të dyshuarit t’i jepet masa më e rreptë për të siguruar praninë e tij, sepse, siç informuan dje, ekzistojnë rrethana që tregojnë rrezik arratisjeje dhe përsëritje të krimit.
Sipas pretendimeve të autoriteteve hetimore, i dyshuari e kreu krimin nga urrejtja. Në përshkrimin e krimit, siç njoftoi Prokuroria, ai theu xhamin në derën hyrëse me një gur dhe menjëherë u largua nga vendi i ngjarjes në drejtim të panjohur.
Ngjarja ndodhi të dielën, më 11 janar, dhe të nesërmen Ministria e Brendshme njoftoi se zyrtarët e policisë nga NJPB Qendër dhe Bit Pazar rreth orës 12:40 në rrugën Kiril i Metodij në Shkup e privuan Sh.A. (54) nga liria e tij, për shkak të dëmtimit të xhamit të Ambasadës së Republikës së Bullgarisë në Shkup.
“Menjëherë pas marrjes së raportit, u morën masa dhe aktivitete për të gjetur autorin dhe për të sqaruar rastin dhe Sh.A. u privua nga liria, dhe pas dokumentimit të rastit, do të ngrihet raport përkatës”, njoftoi Ministria e Brendshme pasditen e 12 janarit.
Lidhur me ngjarjen, Ministri i Punëve të Jashtme dhe Tregtisë së Jashtme, Timço Mucunski, deklaroi pardje se ky ishte një rast i izoluar dhe se institucionet kompetente po punonin urgjentisht për sqarimin e plotë të tij.
Ndërkohë, Ambasada Bullgare në Maqedoni publikoi pamje nga kamerat e sigurisë të objektit, ku shihet xhami i thyer i derës hyrëse të Ambasadës në Shkup.
Paraprakisht, Ministria e Jashtme Bullgare reagoi ashpër, duke e përshkruar incidentin si një sulm të palejueshëm ndaj një misioni diplomatik dhe një shkelje të rëndë të normave ndërkombëtare.
Tensionet mes dy vendeve nuk arrijnë të qetësohen, me Bullgarinë që akuzon Maqedoninë e Veriut për gjuhë të urrejtjes dhe mungesë vullneti institucional për të luftuar incidentet anti-bullgare, ndërsa Shkupi zyrtar shpesh i hedh poshtë këto pretendime, duke theksuar se incidente të tilla janë akte të izoluara.