Kërkesë për paraburgim dhe procedurë kundër 55-vjeçarit që theu xhamin e derës së ambasadës bullgare në Shkup
Prokuroria Themelore Publike në Shkup ka filluar procedurë kundër 55-vjeçarit të dyshuar për vepër penale – Dëmtim i pronës sipas nenit 243, paragrafi 2 i Kodit Penal. Më 11 janar, i dyshuari, siç thonë nga Prokuroria nga urrejtja, dëmtoi derën hyrëse të Ambasadës së Republikës së Bullgarisë, duke thyer xhamin e derës me një gur dhe menjëherë u largua në drejtim të panjohur, transmeton Portalb.mk.
“Prokurori publik propozoi që gjyqtari i procedurës paraprake të caktojë masën e paraburgimit kundër të dyshuarit, sepse ekzistojnë rrethana që tregojnë rrezik ikjeje dhe rrethana që justifikojnë frikën se i dyshuari do ta përsërisë veprën penale”, thonë nga Prokuroria.
Policia dje arrestoi Sh.A. (54) nga Shkupi, i cili më 11 janar ka dëmtuar xhamin e derës hyrëse të Ambasadës së Republikës së Bullgarisë në Shkup. A
Për rastin, Ministria Bullgare e Punëve të Jashtme lëshoi reagim të ashpër dhe dënim të fortë. Sofja zyrtare e vlerësoi aktin si një sulm të papranueshëm ndaj një misioni diplomatik dhe shkelje të rëndë të Konventës së Vjenës, duke akuzuar drejtpërdrejt institucionet maqedonase për krijimin e një klime pandëshkueshmërie.
Në deklaratë, Ministria e Jashtme Bullgare nuk kursen kritikat ndaj autoriteteve maqedonase, duke e lidhur incidentin me ngjarjet e mëparshme.
Së fundmi, Sofja paralajmëron se po e monitoron nga afër rastin dhe “rezervon të drejtën për të ndërmarrë veprime shtesë” për të mbrojtur interesat e saj.
Ministria e Jashtme e Maqedonisë ndërkohë dënoi incidentin.
“Ministria e Punëve të Jashtme dhe Tregtisë së Jashtme dënon incidentin që ndodhi sot, në të cilin një person i panjohur theu xhamin e ndërtesës ku ndodhet Ambasada e Republikës së Bullgarisë në Shkup”, tha Ministria e Punëve të Jashtme.
Tensionet mes dy vendeve nuk arrijnë të qetësohen, me Bullgarinë që akuzon Maqedoninë e Veriut për gjuhë të urrejtjes dhe mungesë vullneti institucional për të luftuar incidentet anti-bullgare, ndërsa Shkupi zyrtar shpesh i hedh poshtë këto pretendime, duke theksuar se incidente të tilla (paraprake) janë akte të izoluara.