Ganiu për parkingun e uzurpuar të Poliklinikës “Bit Pazar”: Adresa për këto punë devijuese është te Qeveria

Kryetari i Komunës së Çairit, Visar Ganiu, në një bisedë me gazetarin e Portalb.mk, i hodhi poshtë pretendimet e Qeverisë, Inspektoratit Shtetëror Ndërtimor, por edhe kryetarit të BNJVL-së se Komuna e Çairit është kompetente për të vepruar në lidhje me hapësirën e uzurpuar mbrapa Poliklinikës së “Bit Pazarit”, e cila përdoret si parking me pagesë ndër vite në mënyrë ilegale . Sipas tij, kompetentë për të vepruar janë Spitali, inspektorati, ndërkaq adresa për të gjitha këto punë devijuese dhe destruktive është te Qeveria.

“Të gjitha ato parcela që janë në oborrin e Poliklinikës janë në pronësi të Poliklinikës dhe ato gjenden në territorin e Çairit, por Poliklinika i ka në pronësi dhe Poliklinika nuk menaxhohet nga Komuna e Çairit, por nga pushteti qendror. Kjo është për ta hedhur fajin ose topin në një tjetër terren që nuk është korrektësi. E kuptoj kryetarin e BNJVL-së që ka dhënë një intervistë të tillë, por ai nuk është i njoftuar me gjithë këto punë. Ne kemi kërkua që të gjitha parcela, në të ardhmen, nga Qeveria t’i marrim që t’i bëjmë, e dini me projektin e fundit me zotëri Pacollin, që të bëjmë garazhe në kate. Një dritë të tillë nuk e kemi marrë, ligji për investime strategjike nuk kaloi dhe nuk di se si ne t’i menaxhojmë parkingjet, kur ju e dini se parkingjet menaxhohen nga Qyteti i Shkupit – nga Ndërmarrja për Parkingje që është e themeluar dhe të gjitha pëlqimet për çdo parking duhet të merren nga ajo ndërmarrje”, thotë Ganiu.

Kryetari i Çairit thotë se nuk është korrekt që për oborrin e dikujt tjetër kronikë e zezë të bëhet Komuna e Çairit.

“Kështu që, ne jemi në procedurë për disa parcela të cilat janë direkt në pronësi tonën që t’i shndërrojmë në parkingje edhe që t’i marrim pëlqimet, procedura duhet të kalojë te ndërmarrja e Qytetit të Shkupit. Kështu që, e dini, rasti që ndodhi me Poliklinikën ku u prish gardhi, hynë brenda – prapë e lidhnin Komunën e Çairit, mendoj që është jokorrektësi, kur dikujt tjetër i hyn në oborr dhe merren me atë – pra organet e rendit kanë intervenuar, njerëzit i kanë larguar, por prapë se prapë kronikë e zezë ishte Komuna e Çairit që nuk ka asnjë kompetencë për oborrin e dikujt tjetër. Edhe universiteti “Shën Kirili” është pjesë e Komunës Qendër, por aty çka ndodh brenda nuk është përgjegjëse Komuna Qendër. Edhe te ne, nuk jemi ne përgjegjës. Mirë që intervenuan organet e rendit, por mendoj që nuk duhet të lidhemi ne pasi që s’kemi që të bëjmë atje se s’kemi kompetenca”, tha Ganiu për Portalb.mk.

I pyetur me parcelën tjetër, që është në tokë shtetërore, Ganiu thotë se për këtë duhet të intervenojnë inspektoratet shtetërore, por sipas tij, këto inspektorate nuk e kryejnë punën në Çair.

“Në lidhje me parcelën tjetër e cila është tokë shtetërore, aty duhet të intervenojë dikush tjetër – Inspektorati i Tregut, inspektoratet tjera që nuk janë në kompetencat tona dhe të shkon të kërkon se si punojnë ata njerëz atje. Ne kemi alarmuar disa herë, kemi ngritur iniciativa, por në terren nuk dalin inspektoratet tjerë bashkë me MPB-në, atëherë është e kotë. Ne kemi dalë disa herë nëpër intervista dhe kemi thënë që Inspektorati i Tregut nuk e kryen punën e tij në Çair. Nuk e kemi vetëm atë, kemi terasa të hapura për çka nuk vijnë të reagojnë, kemi veprimtari të ndryshme se në bazë të çfarë dokumenti janë hapur. Pra, ato nuk i ka komuna si kompetencë, por Inspektorati i Tregut që duhet t’i menaxhojë dhe kontrollojë, jo ne”, tha Ganiu.

Ai kërkoi që të shtrihet decentralizimi dhe t’i jepen Komunës së Çairit kompetenca, por sipas tij, Qeveria çdo send mundohet ta mbajë për vete.

“Për atë ne flasim çdoherë që pushtetarët tanë, qeveritarët tanë duhet më tepër t’u japin komunave kompetenca dhe kërkojmë sa më tepër decentralizimi të shtrihet prej pushtetit qendror të shtrihen kompetencat te pushteti vendor. Një gjë të tillë nuk e bën ekzekutivi, pasi që çdo send mundohet ta mbajë në kontroll dhe jorastësisht e kemi epitetit, zyrtarisht jemi pas Qipros, shteti i dytë më i centralizuar. Adresa për të gjitha këto punë devijuese dhe destruktive është te Qeveria”, tha Ganiu.

Ndryshe, pas një hulumtimi disa-javor, Portalb.mk publikoi se mbrapa objektit të Poliklinikës së Bit Pazarit, qytetarët detyrohen të paguajnë për parking, pavarësisht se parcelat janë në pronësi shtetërore dhe janë të uzurpuara. Paratë e qytetarëve shkojnë në mënyrë të paligjshme në xhepa të personave privat, në vend që të shkojnë në arkën e Spitalit, komunës apo të shtetit.

Hulumtimin e plotë mund ta lexoni: Parkingu i Poliklinikës “Bit Pazar” i uzurpuar, Komuna e Çairit lejon paratë e qytetarëve ilegalisht të hyjnë në xhepa privat