Arsovska tani do metro të autobusëve, por këshilltarët e VMRO-së dhe Levicës nuk votuan për mbështetjen e projektit
Kryetarja Danella Arsovska nuk mund të vazhdojë me projektin e metrosë së autobusëve apo transportit të shpejtë me autobus (BRT), sepse këshilltarët nga VMRO-DPMNE, Levica dhe këshilltari nga “Qyteti i gjelbër human” Gorjan Jovanovski nuk votuan për zbatimin e tij. Në seancën e djeshme të Këshillit të Qytetit të Shkupit, pikë e rendit të ditës me propozim të kryetarit ishte dhënia e pëlqimit për lidhjen e marrëveshjes për realizimin e projektit “Futja e transportit të shpejtë me autobus në qytetin e Shkupit”. Por vendimi nuk kaloi, sepse nuk votuan mjaft këshilltarë, gjegjësisht 19 vota pro, dy këshilltarë ishin kundër, dy abstenuan dhe të tjerët nuk votuan, transmeton Portalb.mk.
Këshilltarët e VMRO-DPMNE-së thanë se nuk e dinë pse po vazhdohet me këtë projekt kur nuk ishte pjesë e programit të Arsovskës “Për Shkup modern”.
“Ne si këshilltarë kemi informacion të pakët. Për të vendosur nëse dhe si do të votoj, kërkoj përgjigje nëse Arsovska ka rinegociuar dhe ka tejkaluar plotësimet e projektit, nëse është i njëjti projekt si Shilegov, nëse autobusët do të lëvizin me gaz, CNG apo do të jenë elektrik. A do të ndërtohet një urë e re Kombet e Bashkuara dhe nga do të vijnë paratë, a do të shkatërrohet gjelbërimi qendror, a do të shkatërrohet parku në Novo Lisiçe, a do të themelohet një ndërmarrje e re publike?”, pyeti Arsovskën, këshilltari nga VMRO-DPMNE Stefan Andonovski.
Arsovska nuk është përgjigjur në pyetjet e këshilltarit, por projektin e ka mbrojtur nënkryetari Aleksandar Trajkovski.
Kryetarja Danela Arsovska më 9 nëntor përmes profilit të saj në Facebook njoftoi se do ta zbatojë projektin Transport të Shpejtë të Autobusëve (BRT) në Shkup, ndonëse menjëherë pas marrjes së detyrës para dy vitesh tha se nuk do ta bëjë këtë, sepse, sipas deklaratës së saj në atë kohë, ishte një premtim i Petre Shilegovit, ndërsa ai i humbi zgjedhjet. Ndërkohë ka ndërprerë tenderin për ndërtimin e projektit.
Sistemi i Transportit të Shpejtë me Autobus mori dritën jeshile nga partnerët ndërkombëtarë. Projekti përfshin ndërtimin e dy terminaleve të rinj, qendrat e transportit, sigurimin e trafikut të pandërprerë të autobusëve, si dhe blerjen e autobusëve të rinj ekologjikë që përdorin CNG. Në projektin konceptual bazë u evidentuan pengesat serioze të zbuluara për zbatimin, të cilat falë përkushtimit dhe punës së administratës së qytetit, janë kapërcyer dhe heqja e tyre mundëson realizimin pa probleme të këtij projekti, njoftuan nga Qyteti i Shkupit më 9 nëntor.