Pas dy viteve, më në fund Qyteti i Shkupit vendosi të ndërtojë metronë e autobusëve

Pas dy viteve të heqjes së pengesave të projektit të shkaktuara nga menaxhmenti i mëparshëm i qytetit, qyteti i Shkupit më në fund do të ketë sistem të ri transporti. Sistemi i Transportit të Shpejtë me Autobus mori dritën jeshile nga partnerët ndërkombëtarë, i cili nis zbatimin në kryeqytet. Projekti përfshin ndërtimin e dy terminaleve të rinj, qendrat e transportit, sigurimin e trafikut të pandërprerë të autobusëve, si dhe blerjen e autobusëve të rinj ekologjikë që përdorin CNG. Në projektin konceptual bazë u evidentuan pengesat serioze të zbuluara për zbatimin, të cilat falë përkushtimit dhe punës së administratës së qytetit, janë kapërcyer dhe heqja e tyre mundëson realizimin pa probleme të këtij projekti, njoftuan nga Qyteti i Shkupit, transmeton Portalb.mk.

“Qyteti i Shkupit, përkundër të gjitha bllokadave, vazhdon me përpjekjet e tij që qytetarëve t’u mundësojë transport publik urban modern dhe në kohë, duke tejkaluar problemet me të cilat ballafaqohen edhe NTP-ja edhe qytetarët për transportin urban. As bllokadat në Këshillin e Qytetit të Shkupit dhe as problemet strukturore me të cilat ballafaqohet NTP, të trashëguara nga menaxhmenti i mëparshëm i ndërmarrjes, nuk do të na pengojnë në përkushtimin tonë të sinqertë për transport urban modern dhe ekologjik”, njoftuan nga Qyteti i Shkupit.

Autobusët e rinj ekologjik me mjedisin dhe sistemi i rishikuar do të reduktojnë ndjeshëm kaosin e trafikut në kryeqytet dhe do të lejojnë që transporti publik të funksionojë pa probleme dhe t’i bëjë vonesat një gjë të së kaluarës.

Siç është njoftuar para dy vitesh, projekti përfshin dy linja me korridore të rezervuara për transport të shpejtë të autobusëve – Linja 1 (në lindje-perëndim), nga Gjorçe Petrov përmes Qendrës deri në Novo Lisiçe, prej 12,81 km dhe 21 stacione autobusi, dhe Linja 2 (veri-jug) do të fillojë nga Stacioni hekurudhor Veri- Shkup do të përfundojë në Pinti, në gjatësi prej 10,4 km me 20 ndalesa. Të dy linjat do të “takohen” në Qendër.

Përveç përfitimeve mjedisore, gjegjësisht zvogëlim të ndotjes së ajrit, “autobusët e shpejtë” do të mundësojnë që koha e udhëtimit midis pikave të fundit të përgjysmohet.

“BRT mundëson zvogëlimin e kohëzgjatjes së transportit të udhëtarëve dhe zvogëlimin e ndotjes së ajrit. Me zbatimin e fazës së parë, traseja Gjorçe Petrov në Novo Lisiçe e gjatë 12,81 km në një drejtim, 21 stacione autobusi dhe 2 terminale, koha e udhëtimit nga 70 minutat aktuale do të ulet për më shumë se 50 përqind, gjegjësisht koha e nevojshme që një automjet të kalojë trasenë nga Gjorçe Petrov në Novo Lisiçe ose anasjelltas do të jetë 35 minuta”, thuhet në komunikatën nga administrata e qytetit.

Traseja e veçantë për autobusët e shpejtë do të ndahet fizikisht nga pjesa tjetër e trafikut, ndërsa autobusët gjatë orës së pikut duhet të arrijnë në çdo 3-4 minuta. Nga Qyteti i Shkupit thonë se “autobusët e shpejtë” do të përmirësojnë ndjeshëm transportin publik të përgjithshëm në Shkup, pasi do të sigurojë mbulim më të madh në të gjithë qytetin duke ridrejtuar autobusët aktualë në linjat e tjera të autobusëve.

“Rritja e numrit të përdoruesve të transportit publik nënkupton zvogëlimin e ndotjes së ajrit dhe përmirësimin e shëndetit të qytetarëve sepse transporti i shpejtë me autobusë me lëndë djegëse efikase çon në zvogëlimin e emetimeve të gazrave serë, emisioneve të grimcave dhe ulje të niveleve të zhurmës”, theksojnë nga Qyteti i Shkupit.

Disklejmeri për Smart Balkans, disclaimer