Arsovska akuzoi KSHPK-në për linçim publik: Askush nuk më informoi se duhet të dorëzoj deklaratë pasurie pas përfundimit të mandatit
Ish-kryetarja e Qytetit të Shkupit, Danella Arsovska, pretendon se askush nuk e ka informuar se duhej të paraqiste deklaratë të pasurisë së saj pas largimit nga detyra. Në këtë drejtim, ajo reagoi ashpër në një letër me shkrim ndaj veprimit të Komisionit Shtetëror për Parandalimin e Korrupsionit (KSHPK), i cili e vendosi atë në listën e kryetarëve që nuk kanë paraqitur deklaratë të pasurisë së tyre pas largimit nga detyra ose fillimit të mandatit të tyre, transmeton Portalb.mk.
Në letrën drejtuar KSHPK-së, të cilën ajo ia dërgoi edhe mediave, Arsovska pretendon se është cak i një linçimi publik për degradim.
“Nëse e kryeni funksionin tuaj siç duhet dhe në mënyrë të vazhdueshme, nuk do të keni tendencë të inicioni linçim publik për degradim, sepse nëse do të ishit profesional dhe do të kishit përfaqësuar ligjin, do të na kishit informuar personalisht për detyrimin ose me një deklaratë përmes mediave – pikërisht në të njëjtën mënyrë që, për fat të keq, vepruat për të promovuar veten se nuk janë paraqitur deklarata pas ndërprerjes së funksionit”, shkruan Arsovska në letrën e saj drejtuar KSHPK-së.
Arsovska i bëri thirrje KSHPK-së që të merret me korrupsionin multimilionësh, krimet e rënda dhe dështimin institucional për të vepruar në raste të shumta në vend, në vend që të kërcënojë me gjoba për një detyrim për të cilin, siç thotë ajo, qartësisht nuk i ka informuar të gjithë 35 ish-kryetarët e komunave që nuk u rizgjodhën.
“Nëse do ta kishit bërë punën tuaj siç duhet dhe do të kishit bashkëpunuar me institucionet, do t’i kishit informuar ata për ekzistencën e të dy detyrimeve në fillim të mandatit tuaj”, thotë Arsovska, duke shtuar se pas përfundimit të detyrës si kryetare, nuk ka pasur ndryshime në statusin e saj pasuror sipas datës së përfundimit të mandatit.
Dje, Komisioni Shtetëror për Parandalimin e Korrupsionit (KSHPK) publikoi listat me emrat e kryetarëve të komunave që nuk kanë paraqitur deklaratë të statusit të tyre pasuror dhe interesave. Komisioni Kundër Korrupsionit publikoi dy lista – njëra me emrat e kryetarëve të komunave, mandati i të cilëve ka mbaruar, dhe tjetra me ata që fituan mandat katërvjeçar si kryetar komune në zgjedhjet e fundit lokale.
Në listë janë edhe ish-kryetarja e Qytetit të Shkupit, Danela Arsovska, dhe pasardhësi i saj në detyrë, Orce Gjorgjievski, të cilët nuk kanë paraqitur deklaratë për gjendjen e tyre pasurore pas përfundimit, pra pas fillimit të mandatit.