Në ENER është publikuar Propozim Ligji për ndryshimin dhe plotësimin e Ligjit për lobim
Me Propozim Ligjin për ndryshimin dhe plotësimin e Ligjit për lobim propozohen zgjidhje për forcimin e transparencës, integritetit dhe llogaridhënies në proceset e krijimit dhe zbatimit të politikave publike, transmeton Portalb.mk.
Me ndryshimet e propozuara:
- zgjerohet fushëveprimi i lobimit në proceset e miratimit, ndryshimit, zbatimit dhe vlerësimit të politikave publike;
- precizohen rregullat për përfaqësimin e interesit publik;
- forcohen mekanizmat për parandalimin e lobimit të fshehtë dhe të palejuar, duke përfshirë edhe lobimin përmes kanaleve digjitale dhe rrjeteve sociale;
- vendosen detyrime për organet ndaj të cilave zhvillohet lobimi lidhur me përgjigjet dhe realizimin e kontakteve;
- avancohet transparenca përmes publikimit të informacioneve për pjesëmarrësit, interesat e përfaqësuara, iniciativat dhe takimet zyrtare;
- forcohen mbikëqyrja dhe kontrolli nga ana e Komisionit Shtetëror për Parandalimin e Korrupsionit;
- parashikohen sanksione të reja dhe më të larta për kundërvajtje për mosrespektimin e detyrimeve ligjore.
Qëllimi është krijimi i një sistemi më të qartë dhe më efikas, në të cilin lobimi është instrument legjitim dhe transparent për pjesëmarrje në krijimin e politikave publike, ndërsa njëkohësisht parandalohet ndikimi i fshehtë dhe i palejuar mbi vendimmarrjen publike.
Kujtojmë se Maqedonia e Veriut që nga viti 2024 ka organizatën e parë lobuese. Dy vjet pas miratimit të kornizës ligjore, kompania shërbyese Prima inkaso DOOEL Shtip u bë organizata e parë lobuese e regjistruar në Regjistrin e lobistëve, lobi organizatave dhe lobimit. Kërkesa është dorëzuar nga Komisioni Kundër Korrupsionit përmes platformës elektronike lobisti.dksk.mk.