‘Vdekje për shqiptarët’: Gjuha e urrejtjes godet Tearcën, mbishkrim nacionalist në stadium (Video)
Mbishkrimi nacionalist dhe me gjuhë të urrejtjes ‘Vdekje për shqiptarët’ është paraqitur në stadiumin e Tearcës, vendbanim ku me vite bashkëjetojnë komuniteti shqiptar, maqedonas dhe turk, shkruan Portalb.mk.
Ky mbishkrim sot gjatë ditës bëri bujë në opinion dhe media, duke nxjerrë në pah se gjuha e urrejtjes prekë edhe këtë rajon.
Nga Policia për Portalb.mk konfirmuan se rasti është paraqitur te ata dhe se merren masa për zbardhjen dhe identifikimin e autorëve.
Nga Komuna e Tearcës, njoftuan se menjëherë pas shfaqjes së këtij mbishkrimi stadiumi është pajisur me kamera sigurie.
“Pas shfaqjes së afisheve fyese dhe nxitëse të urrejtjes, që synojnë prishjen e marrëdhënieve ndëretnike, stadiumi i Tearcës është pajisur me kamera sigurie, me qëllim parandalimin e akteve jo të hijshme dhe garantimin e sigurisë publike”, thanë nga Komuna e Tearcës.
Pak orë më vonë, mbishkrimi u fshi nga të rinjtë e Komunës së Tearcës.
Ky mbishkrim është paraqitur vazhdimisht nëpër vende të ndryshme publike.
Ndryshe, Portalb.mk në vazhdimësi ka monitorurar dhe raportuar gjuhën e urrejtjes në Maqedoninë e Veriut, e cil mbetet e përhapur veçanërisht në sport.
Redaksia jonë përmes një sërë shkrimesh ka argumentuar se mosreagimi adekuat i Ministrisë së Brendshme, Prokurorisë dhe lëndëve të pakta me aktgjykim në gjykatë, e ushqejnë edhe më shumë gjuhën e urrejtjes.
- LEXO: Sporti dhe narrativat e dëmshme: si thirrjet nacionaliste krijojnë tensione, përderisa ekipi kombëtar i futbollit tregon realitet tjetër
- LEXO: RMV, urrejtja që nuk nuk shihet e ndëshkohet: nga qindra raste, policia ka vepruar vetëm për 4 në gjysmën e parë të vitit (Infografik)
- LEXO: Heshtja institucionale e ushqen urrejtjen në Maqedoni, nevojiten sanksione të rrepta për thirrjet nacionaliste dhe raciste
- LEXO: Tifozët e Kumanovës me thirrje raciste e gjuhë të urrejtjes ndaj shqiptarëve në prani të kryeministrit dhe ministrit të Brendshëm