Sterilizimi i nënës pas prerjes së tretë cezariane, drejtoresha e KGjA-së në Shkup me propozim për të ulur vdekshmërinë e nënave

By N. D. On 19/03/2026 12:42

Shtatzani, shtatëzënë — Foto ilustrim: freestocks on Unsplash

Përqindja e prerjeve cezariane është rritur vërtet dhe bart rrezik si për nënën ashtu edhe për fëmijën, dhe ky është një problem i madh. Kjo veçanërisht për shkak të faktit se një nënë që kishte prerje të katërt cezariane dhe shtatzëni të pestë vdiq kohët e fundit, transmeton Portalb.mk.

Këtë e tha drejtoresha e KGjA-së; Irena Aleksieska Papestiev në konferencën e sotme për shtyp në Ministrinë e Shëndetësisë.

“Një prerje cezariane ndonjëherë justifikohet për jetën e nënës dhe të foshnjës. Gjithmonë pas prerjes së tretë cezariane, parashikohet sterilizimi i nënës sepse çdo prerje cezariane pasuese është ndërlikim. Ndërkohë, nuk mund ta sterilizojmë nënën pa marrë pëlqimin. Gruas iu ofrua sterilizimi pas prerjes së tretë cezariane, por ajo refuzoi. Ajo lindi një fëmijë të katërt pas shtatzënisë së pestë dhe lindën ndërlikime. Duhet t’i kushtojmë vëmendje vdekshmërisë së lehonave, sepse gjithnjë e më shumë gra po fillojnë të lindin në një moshë më të madhe kur ka një numër të jashtëzakonshëm të komorbiditeteve. Tani patëm një paciente tjetër shumë të vështirë, e cila u diagnostikua me një sëmundje onkologjike. Në fillim të shtatzënisë, i rekomanduam që ta ndërpriste, por gruaja është 43 vjeç dhe tha se e pranon rrezikun. Gruaja kishte një problem serioz, me cirrozë, me ascit, me një operacion katër-orësh me prerje cezariane, me stres të jashtëzakonshëm për të gjithë në dhomë, por për fat të mirë dhe falë të gjithë ekipit, ajo lindi. Gjithnjë e më shumë paciente të moshuara me komorbiditete po lindin dhe kemi gjithnjë e më shumë paciente onkologjike gjinekologjike. Fokusi tjetër duhet të jetë përditësimi i protokolleve, rekomandimet për të mos kryer prerje cezariane pa nevojë. Një prerje cezariane ndonjëherë mund të shpëtojë jetën e nënës dhe foshnjës, por nëse kryhet pa nevojë, mund të çojë në ndërlikime”, tha drejtoresha dhe shpjegoi protokollet:

“Gjithashtu duhet të punojmë për rritjen e ndërgjegjësimit në mesin e popullatës. Duhet të organizojmë fushata për të rritur ndërgjegjësimin”, shtoi ajo.

Aliu: Maqedonia e renditur lart në nivel global në uljen e vdekshmërisë neonatale

Ministri i Shëndetësisë, Azir Aliu nga ana tjetër në konferencën për shtyp me Aleksioska Papestiev dhe shefin e Zyrës së OBSH-së në Maqedoni, Akim Ali, si dhe me përfaqësues të UNICEF-it dhe UNFPA-së, prezantuan rezultatet e raportit më të fundit të Grupit ndëragjencior të Kombeve të Bashkuara për vlerësimin e vdekshmërisë së fëmijëve për vitin 2025.

“Sipas rezultateve të raportit, vendi ynë renditet ndër vendet më të suksesshme në nivel global në uljen e vdekshmërisë neonatale dhe të vdekshmërisë së fëmijëve nën moshën pesëvjeçare, duke u njohur si shembull për zbatim të suksesshëm të politikave shëndetësore të integruara dhe të koordinuara. Në periudhën e kaluar është shënuar përparim i dukshëm, ku shkalla e vdekshmërisë neonatale është ulur për 87 përqind, nga 8,1 në 1,1 për 1.000 lindje të gjalla, ndërsa shkalla e vdekshmërisë së fëmijëve nën pesë vjeç është ulur për 75 përqind, nga 11,1 në 2,8 për 1.000 lindje të gjalla. Këto rezultate janë fryt i reformave të vazhdueshme sistemore, i forcimit të koordinimit institucional dhe i partneritetit me organizatat relevante ndërkombëtare, si dhe i zbatimit të masave gjithëpërfshirëse për përmirësimin e cilësisë së kujdesit shëndetësor”, theksoi ministri Aliu.

Në këtë drejtim, theksojnë nga MSH, veçanërisht të rëndësishme janë aktivitetet e orientuara drejt forcimit të kujdesit urgjent obstetrik dhe neonatal, rishikimit dhe harmonizimit të protokolleve klinike, përmirësimit të praktikave për reanimimin e të porsalindurve dhe parandalimin e infeksioneve, si dhe përmirësimit të sistemit të transportit mjekësor. Paralelisht, Ministria e Shëndetësisë po zbaton në mënyrë të qëndrueshme masterplanin për kujdesin perinatal 2020–2030, i cili siguron vendosjen e një rrjeti të stratifikuar perinatal, sipas nivelit të rrezikut, dhe mundëson përmirësim të vazhdueshëm të cilësisë së shërbimeve shëndetësore në të gjitha nivelet e kujdesit shëndetësor.

Ndryshe, në tremujorin e fundit të vitit 2025, në Maqedoninë e Veriut u regjistruan më shumë vdekje sesa lindje, ashtu që dallimi është 956 persona.

“Në tremujorin e katërt të vitit 2025, u regjistruan 3 842 lindje dhe 4 798 vdekje”, raportoi Enti Shtetëror i Statistikave, ashtu që numri i lindjeve shënoi ulje për 2.5 përqind, ndërsa vdekjet për 8.2 %, krahasuar me periudhën e njëjtë të vitit paraprak.

Enti raportoi që në këtë periudhë ka pasur 2 310 martesa e 469 shkurorëzime, ashtu që numri i martesave është ulur për 4.8 %, ndërsa i shkurorëzimeve për 10.3 %.