Sofja ngriti alarmin për amendamentet e Thomas Weitz, Mickoski: “Duan të na tërheqin në fushatën e tyre, t’i injorojmë”

By N. D. On 23/03/2026 15:07

Flamuri i Maqedonisë së Veriut (RMV), Bullgarisë dhe i Bashkimit Evropian (BE). Foto: Oleksandr Filon në Canva

Amendamentet në raportin e Thomas Weitz për Maqedoninë në Parlamentin Evropian kanë ndezur përsëri alarmin në Sofje. BGNES, publikoi një reagim të gjatë në të cilin vlerëson se kërkesa që Këshilli Evropian të deklarojë statusin ligjor të protokollit të dytë të nënshkruar midis Bullgarisë dhe Maqedonisë është një përpjekje që vendi ynë të fillojë negociatat me BE-në pa përmbushur kushtin nga Korniza Negociuese – që bullgarët të hyjnë në Kushtetutë, transmeton Portalb.mk.

“Raportuesi i Parlamentit Evropian për Maqedoninë e Veriut, Thomas Weitz, ka paraqitur propozim për një ndryshim në raportin e tij të fundit, i cili vë në pikëpyetje protokollin e dytë të Marrëveshjes midis Bullgarisë dhe Maqedonisë së Veriut, të cilin vetë BE e ka treguar si pjesë të Kornizës Negociuese. Me ndryshimin 108, Weitz propozon që teksti i rezolutës së ardhshme të shkruhet në mënyrë që Parlamenti Evropian “t’i bëjë thirrje shërbimit ligjor të Këshillit që të sqarojë urgjentisht çdo paqartësi në lidhje me statusin ligjor të protokollit të dytë dypalësh të Marrëveshjes për Fqinjësi të Mirë dhe Miqësi midis dy vendeve në lidhje me procesin e pranimit”.

Një tekst që tingëllon i padëmshëm në vetvete, por pse është pengesë? Protokolli thotë shprehimisht se konferenca e ardhshme ndërqeveritare, e cila përfundon fazën e hapjes së negociatave, do të zhvillohet vetëm pasi Maqedonia e Veriut të përfshijë bullgarët në kushtetutën e saj. Protokolli u miratua në kuadër të Takimit të Dytë të Komisionit të Përbashkët Ndërqeveritar sipas Nenit 12 të Traktatit të Miqësisë, Fqinjësisë së Mirë dhe Bashkëpunimit midis Bullgarisë dhe Maqedonisë së Veriut, të mbajtur në Sofje më 17 korrik 2022.

Qëllimi i këtij teksti është të fillojë negociatat për pranimin e Maqedonisë së Veriut pa përmbushur detyrimet e Shkupit dhe para se bullgarët të përfshihen në ligjin e tyre themelor. Nuk mund të mos shkaktojë shqetësim që kërkesa e Thomas Weitz korrespondon plotësisht me politikën e kryeministrit të Maqedonisë së Veriut, si dhe të presidentes Gordana Siljanovska-Davkova, komenton në analizën e BGNES.

Media kujton se vitin e kaluar, ish-deputetja Liljana Popovska, e cila është e lidhur me ish-kryeministrin Nikolla Gruevski, nisi procedurat për të kundërshtuar protokollin e dytë.

“Ankesa e saj u pranua për shqyrtim nga Gjykata Kushtetuese e Maqedonisë së Veriut brenda një kohe të shkurtër. Popovska pretendon se protokolli është në kundërshtim me Kushtetutën, ka një formë të pasaktë ligjore dhe prek çështje që lidhen me identitetin. Megjithatë, gjykata nuk ka vendosur për të as gjysmë viti më vonë. Kjo ngre pyetjen e arsyeshme nëse raportuesja e PE dëshiron që shërbimi ligjor i Këshillit të marrë vendim në vend të Gjykatës Kushtetuese në Shkup, në mënyrë që një vlerësim i mundshëm i favorshëm në favor të Maqedonisë së Veriut të paraqitet si një vendim “evropian” dhe jo si një përpjekje nga një vend kandidat për të anashkaluar kushtet”, shkruan BGNES.

Në Sofje ka shqetësim edhe për amendamente të tjera që prekin çështje si vendimet e Gjykatës Evropiane për të Drejtat e Njeriut, të cilat, sipas mediave bullgare, indirekt i referohen vetë Bullgarisë.

Nga ana tjetër, në Shkup këto zhvillime shihen si pjesë e tensioneve politike, ndërsa kryeministri Hristijan Mickoski ka sugjeruar që tema të mos përdoret për qëllime elektorale në Bullgari.

Mickoski kur u pyet nga gazetarët tha se për të, kjo situatë ka qenë e pritshme.

“Unë dhe zoti Weitz ndodheshim rastësisht në të njëjtin aeroplan, i cili fluturonte në linjën Bruksel-Vjenë. Rastësisht, patëm një takim këtu, biseduam dhe unë parashikova të gjitha këto që po ndodhin tani në atë takim dhe e informova zotin Weitz se do të ndodhnin. Por cili është qëllimi i të gjitha këtyre tani, dhe për këtë arsye kërkoj kujdes nga ana e medias. Qëllimi është të përfshihemi në fushatën zgjedhore në Bullgari për këtë temë. Prandaj, ju kërkoj të mos na lejoni t’i japim alibi fqinjit tonë lindor, i cili i përket shekullit të kaluar, për të bërë fushatë për këtë çështje. Thjesht ju kërkoj të injoroni të gjitha këto. Dhe ne, si qeveri, po flasim me miqtë tanë në Bruksel. Në këtë moment, nuk do të doja të ishim mjet në duart e politikanëve në Bullgari që i përkasin shekullit të kaluar dhe nuk shikojnë drejt së ardhmes”, tha Mickoski.

Maqedonia e Veriut mbetet e ngujuar në rrugëtimin drejt BE-së, shkaku i kontestit me Bullgarinë fqinje. RMV duhet t’i bëjë ndryshimet kushtetuese për të vazhduar rrugën drejt BE-së. Ndryshimi kushtetutës përfshin shtimin e bullgarëve dhe etnive tjera në Kushtetutë. Ndryshimi kërkon shumicë prej dy të tretash dhe negociatat me BE-në nuk do të fillojnë derisa të bëhen këto ndryshime.

Me kusht të ndryshimi të Kushtetutës, Maqedonia e Veriut më 19 korrik të vitit 2022 i filloi bisedimet qasëse me BE-në me mbajtjen e konferencës së parë ndërqeveritare, pas miratimit të propozimit francez të cilin Maqedonia e Veriut e miratoi më 16 korrik 2022. Propozimi atë kohë u votua në parlament pa pjesëmarrjen e opozitës së atëhershme e cila tani është në pushtet.