Situata me ethet e Nilit Perëndimor në RMV po qetësohet, janë konfirmuar 53 raste
Situata epidemiologjike me ethet e Nilit Perëndimor po qetësohet, ndërsa masat e ndërmarra dhe koordinimi i përforcuar ndërmjet Ministrisë së Shëndetësisë, institucioneve shëndetësore dhe komunave po japin rezultate, informoi sot në konferencë për media ministri i Shëndetësisë, Sasho Klekovski, transmeton Portalb.mk.
“Deri më tani, në vend janë konfirmuar gjithsej 53 raste me ethe të Nilit Perëndimor. Të dhënat tregojnë se kohëzgjatja mesatare e trajtimit spitalor është 14 ditë, ndërsa periudha më e shkurtër deri në lëshimin nga spitali ka qenë tetë ditë. Institucionet po e ndjekin vazhdimisht situatën, ndërsa veprimi i koordinuar në nivel qendror dhe lokal po kontribuon në stabilizimin e saj”, theksoi Klekovski.
Drejtori i Klinikës Universitare për Sëmundje Infektive dhe Gjendje Febrile, dr. Fadil Cana, informoi se aktualisht pesë pacientë po trajtohen në Repartin e Kujdesit Intensiv. Tre prej tyre janë ekstubuar dhe gjendja e tyre shëndetësore është përmirësuar. Deri më tani, 28 pacientë janë shëruar dhe janë lëshuar nga trajtimi spitalor.
Ministri Klekovski njëkohësisht u bëri thirrje të fuqishme prindërve që t’i vaksinojnë me kohë fëmijët e tyre kundër fruthit, duke pasur parasysh se përfshirja me vaksinim është rreth 62 për qind.
“Qëllimi ynë është të parandalojmë me kohë një epidemi të mundshme të fruthit. Vaksinat janë mbrojtja më e sigurt nga kjo sëmundje ngjitëse, prandaj u bëj thirrje prindërve që të mos e shtyjnë imunizimin e fëmijëve të tyre”, porositi Klekovski.
Nevoja për rritjen e përfshirjes me vaksinim theksohet edhe më shumë për shkak të rasteve të regjistruara të fruthit në vendet fqinje. Autoritetet shëndetësore vazhdojnë ta ndjekin me kujdes situatën, të koordinohen me të gjitha institucionet kompetente dhe ta informojnë publikun në kohë.
Për ethet e Nilit Perëndimor nuk ka bar konkret antiviral. Mjekimi ka për qëllim të lehtësojë simptomat në kombinim me pushim, konsumim të lëngjeve dhe barnave për temperaturën dhe dhimbjen. Rastet e rënda shtrohen në spital.
Mbrojtja më e mirë është shmangia e pickimit nga mushkonjat duke përdorur repelentë, duke veshur rroba me mëngë të gjata dhe pantallona të gjata, duke instaluar rrjeta mbrojtëse në dritare dhe duke e larguar ujin e ndenjur rreth shtëpisë, si vend ku shumohen mushkonjat.
Nëse keni temperaturë të lartë, dhimbje të forta të kokës, bllokim të qafës, konfuzion ose dobësi në krahë ose këmbë pas pickimit nga mushkonja, duhet të kërkoni ndihmë mjekësore.