SHBA-të pezulluan sanksionet ndaj Lukoil për stacionet e benzinës jashtë Rusisë

Departamenti i Thesarit i SHBA-së ka pezulluar disa sanksione ndaj gjigantit rus të energjisë Lukoil, duke lejuar që stacionet e tij të benzinës jashtë Rusisë të vazhdojnë të operojnë, transmeton Portalb.mk.

Ky veprim në fakt lejon që stacionet e benzinës me markën Lukoil të vazhdojnë t’u shërbejnë klientëve, duke parandaluar njëkohësisht riatdhesimin e parave në Rusi, e cila ka qenë nën sanksione të gjera të SHBA-së dhe BE-së që nga fillimi i luftës në Ukrainë.

Departamenti i Thesarit tha se vendimi kishte për qëllim zbutjen e dëmit për konsumatorët dhe furnizuesit që duan të angazhohen në transaksione të rregullta në stacionet e benzinës me pakicë Lukoil. Vendimi pezullon pjesërisht masat e vendosura në tetor nga presidenti i SHBA-së Donald Trump.

Pas një rezistence të gjatë, Trump vendosi sanksione ndaj Lukoil dhe Rosneft më 21 tetor për shkak të refuzimit të Vladimir Putin për t’i dhënë fund luftës në Ukrainë. Kjo i ka detyruar blerësit më të mëdhenj të naftës ruse të kërkojnë furnizues alternativë.