RMV, fëmijët që kanë marrë tri doza të Di-Te-Per nga e hëna mund të pranohen në kopshte
Javën e kaluar, Inspektorati Shtetëror Sanitar dhe Shëndetësor (IShSSh) ka kryer rreth njëqind inspektime të jashtëzakonshme në kopshte në të gjithë vendin në përputhje me vendimin e Ministrisë së Shëndetësisë, për të kontrolluar nëse janë vaksinuar plotësisht apo pjesërisht fëmijët me Di-Te-Per kundër kollës së mirë, transmeton Portalb.mk.
Drejtoresha e këtij institucioni, Renata Mlladenovska, thotë se çerdhet e respektojnë vendimin e dhënë ndaj tyre dhe deri më tani nuk kanë vërejtur ndonjë parregullsi në punën e tyre.
“Kopshtet, qofshin ato publike apo private, bashkëpunojnë me ne. Ata respektojnë vendimin që u është dhënë. Publikohet në institucionet e tyre, për të njoftuar edhe prindërit. Nga kontrollet e kryera deri më tani nuk kemi konstatuar mangësi. Përgjegjësit në kopshte kontrollojnë dhe përditësojnë të dhënat për çdo fëmijë. Masa respektohet. Tani për tani jemi të kënaqur me mënyrën se si po kryhen kontrollet e jashtëzakonshme”, tha ajo.
Sipas saj, gjatë ditës së djeshme Komisioni për Sëmundje Infektive ka dhënë sqarim për vendimin ekzistues, kanë marrë procesverbalin nga KSI-ja dhe siç tha ajo, janë pajtuar që vendimi i ri t’u dorëzohet sot.
“Nga e hëna duhet të pranohen fëmijët që kanë përfunduar vaksinimin e tri dozave të Di-Te-Per-it”, tha Mlladenovska.
Në pyetjet e gazetarëve se kush ka lejuar që në periudhën e kaluar të pranohen fëmijët që nuk janë vaksinuar, ajo tha se është kompetencë e IShSSh-së që t’i thërrasë prindërit në zgjidhje apo ndëshkim, nëse prindi nuk pranon të vaksinojë fëmijën.
“Po marrim gjithnjë e më shumë lista ku ka fëmijë që nuk kanë marrë ende një dozë të vaksinës. Është në kompetencën tonë. Ne i kontrollojmë ato lista. Ne do të dalim nga kjo situatë. Këtë javë kemi bashkëpunim të mirë me kopshtet. Durim edhe për prindërit, sepse nuk është e drejtë të rikthehen sëmundjet infektive, jemi tashmë në shekullin e 21-të”, ka thënë drejtoresha e IShSSh-së.
Për numrin e madh të fëmijëve të vaksinuar që jetojnë brenda vendit prej 95 për qind, ndërsa se në çerdhet e Shkupit janë të vaksinuar vetëm 50 për qind e fëmijëve, Mlladenovska tha se brenda fëmijët vaksinohen rregullisht dhe prindërit janë më të përgjegjshëm, gjegjësisht i sjellin fëmijët rregullisht për vaksinim dhe respektojnë orarin e vaksinimit.
“Natyrisht që problemi është në qytetin e Shkupit. Shpresoj që këto epidemi të na bëjnë të vetëdijshëm”, tha ajo.
Kujtojmë se me 14 mars, Komisioni për Sëmundje Infektive, dje vendosi që fëmijët që janë vaksinuar me dozën e tretë të DiTePer në 6 muajt e fundit mund të shkojnë në kopsht. Në të njëjtën kohë, ata duhet të rivaksinohen brenda 6 muajve pas marrjes së dozës së tretë.
“Për shkak të epidemisë po e shkurtojmë kohën e rivaksinimit nga një vit në 6 muaj. Situata nuk është e mirë, nuk është stabile dhe në këtë situatë kemi arritur nga sjellja e papërgjegjshme e shumë qytetarëve para shumë vitesh. Të dhënat e 50 përqind të fëmijëve të vaksinuar janë një e dhënë shkatërruese për vendin dhe këtu duhet të punojmë shumë. Në Shkup kemi 170 raste me kollë të mirë dhe në vend janë gjithsej 200 dhe ky numër do të rritet në periudhën e ardhshme. Është e mundur që në periudhën e ardhshme të dalim me masa më të rrepta epidemiologjike, varet nga zhvillimi i situatës”, tha kryetari i Komisionit për sëmundje infektive, Aleksandar Petliçkovski.