Pas BDI-së, edhe Kovaçevski është i gatshëm t’ia lëshojë pozitën e kryeministrit VMRO-së, por ka një kusht
Bashkimi Demokratik për Integrim pranoi që të heqë dorë nga kryeministri i parë shqiptarë dhe në vend të tyre VMRO-DPMNE, të propozojë kryeministër. Kryeministri Dimitar Kovaçevski në takim me gazetarët sot tha se ajo është e pranueshme, por me një kusht që kryeministri të jetë nënshkrues i ndryshimeve kushtetuese, njofton Portalb.mk.
“Qëndrim i BDI-së është përafërsisht i fuqishëm”, tha kryeministri duke shtuar se edhe ai është i gatshëm që ta lëshojë pozitën e kryeministrit nëse, ndonjëri prej VMRO-DPMNE-së do të bëhej propozues i ndryshimeve kushtetuese.
“Duhet të dihet se unë si kryeministër jam propozues i ndryshimeve kushtetuese. Nëse, cilido nga VMRO-DPMNE pranon që të bëhet propozues i ndryshimeve kushtetuese, unë me kënaqësi do të ia lëshoja vendin”, thonë burimet qeveritare.
Propozimi i këtillë mbrëmë erdhi nga, Bujar Osmani i cili gjatë një emisioni në TV21 deklaroi se BDi është e gatshme që t’ia lëshojë vendin e kryeministrit shqiptar VMRO-DPMNE-së.
“Qeveria është shumë më e madhe se pozicioni i kryeministrit. Ne tani po bëjmë kompromis për kushtetutën, nuk do të lejojmë asnjë alibi. Nëse Mickoski thotë se kërkon edhe kryeministrin deri në zgjedhje, edhe kryeministrin ia japim. Ndryshimet kushtetuese janë aq jetike, sa i tejkalon të gjitha sakrificat.”- tha Osmani.
Nga ana tjetër, burimet qeveritare thonë se VMRO-së i kanë propozuar edhe zgjedhje të parakohshme nëse pranon që t’i votojë ndryshimet kushtetuese.
“Ofruam që të votohen ndryshimet kushtetuese dhe menjëherë të shkojmë në zgjedhje. Kryetari i VMRO-DPMNE-së publikisht thotë se nuk është kundër ndryshimeve kushtetuese dhe pranon që të hyjë në Qeveri. Ai ka edhe një kusht që BDI të jetë jashtë Qeverisë, që do të sjellë deri te destabilizimi, pasi që edhe Aleanca për Shqiptarët dhe Besa paralajmëruan se në një rast të tillë do ta lëshojnë qeverinë. Në këtë rast VMRO-DPMNE do të ketë më shumë ministra nëse i përzë shqiptarët”, thonë burime qeveritare.
Nga Qeveria përsërisin se korniza negociuese në vete i përmban të gjitha kufijtë për identitetin maqedonas dhe për mbajtjen e konferencës së dytë ndërqeveritare, ndërkaq prej nesh pritet vetëm që t’i miratojmë ndryshimet kushtetuese.
Gjatë takimit, me Mickoskin Kovaçevski i ka propozuar të votohen ndryshimet kushtetuese, pastaj të formohej qeveria, në të cilën nga 10 resore që aktualisht i menaxhon LSDM, 5 t’i jepeshin VMRO-së dhe kjo qeveri t’i përgatisë zgjedhjet parlamentare. Për Mickoskin kjo ishte e pranueshme, nëse BDI-ja nuk do të ishte brenda qeverisë. BDI-ja nëpërmjet një reagimi publik pranoi të dalë nga qeveria, nëse opozita i voton ndryshimet kushtetuese, edhe pse nuk është ende e qartë së nëse dalin nga qeveria, çfarë do të bëhet me premtimin kryesor të zgjedhjeve të kaluara – kryeministri i parë shqiptar, për të cilin me këmbëngulje kanë premtuar se do ta realizojnë.
Përveç kërkesave plastike, Mickoski kërkoi nga institucionet evropiane që të garantojnë identitetin maqedonas, të përgatisin një paketë ekonomike për qytetarët dhe bizneset maqedonase, si dhe garanci se Bullgaria do t’i zbatojë vendimet e Gjykatës Evropiane për të Drejtat e Njeriut, të cilat kanë të bëjnë me të drejtat e maqedonasve në Bullgari.
Maqedonia e Veriut pas 17 vitesh me 19 korrik të vitit 2022 filloi bisedimet qasëse me BE-në me mbajtjen e konferencës së parë ndërqeveritare.
Megjithatë, negociatat nuk do të fillojnë derisa të bëhen ndryshimet kushtetuese për përfshirjen e bullgarëve në Kushtetutë nga pala e Maqedonisë së Veriut, të cilat për votim në Kuvend kërkojnë dy të tretat e deputetëve, të cilat shumica nuk i ka, prandaj duhet mbështetje nga opozita maqedonase, e cila deri në realizimin e takimit të liderëve kishte qëndrim të betonizuar se nuk do të votojnë për ndryshimin e Kushtetutës.
Nëse nuk bëhen ndryshimet kushtetuese deri në nëntor të këtij viti, procesi eurointegrues i RMV-së rrezikon të bllokohet përsëri.
- LEXO: Mickoski: LSDM-ja duhet të inkurajohet dhe të pranojë dorën e shtrirë për qeveri kalimtare
- LEXO: Oferta për hyrje në qeveri befasishëm ia ndërroi mendjen VMRO-së për ndryshimet kushtetuese, BDI e gatshme “të sakrifikohet”
- LEXO: Qeveria e zgjeruar e Maqedonisë së Veriut, “manovrim politik”
- LEXO: RMV, Mickoski i ka ofruar 24 shtatorin, 1 ose 8 tetorin si data për zgjedhje të parakohshme parlamentare