Nga sot ka filluar linja e rregullt e autobusit nga Tetova në Kodrën e Diellit
Ndërmarrja Publike “Tetova Transport” nga sot ka vënë në dispozicion të qytetarëve dhe turistëve linjën e rregullt të transportit publik në drejtimin nga Tetova në Kodër të Diellit dhe anasjelltas, raporton Portalb.mk.
Çmimi për person për biletë vajtje-ardhje, Tetovë-Kodra e Diellit-Tetovë do të kushtojë 200 denarë.
Nga komuna e Tetovës, të enjten thanë se kjo linjë do të rrisë numrin e turistëve.
“Kjo linjë dukshëm do të ndikojë jo vetëm në rritjen e numrit të turistëve, por edhe në lehtësimin e komunikacionit në këtë kas rrugor”, thonë nga Komuna e Tetovës.
Oraret e transportit publik nga Tetova në Kodrën e Diellit mund t’i shihni më poshtë.
Pavarësisht pse autobusët e transportit publik përballen me vështirësi qarkullimi në komunikacion, interesimi i qytetarëve në Tetovë për të përdorur transportin publik është në rritje, këtë e thonë të dhënat nga shitja e biletave për autobusë të cilat Portalb.mk i siguroi nga raportet e punës dhe ata financiare të Ndërmarrjes Publike “Tetova Transport”. Për gjashtë-mujorin e parë të vitit 2023 janë shitur afër 140 mijë bileta, ndërsa periudhën e njëjtë të vitit 2022 u shitën 12.698 bileta.
Përndryshe, Ndërmarrja Publike “Tetova Transport”- Tetovë është e themeluar me vendim të Këshillit të Komunës së Tetovës me 30.09.2019. Ndërmarrja funksionon që nga viti 2021 me disa ndërprerje. Transporti Publik prej 30 majit 2022 u riaktivizua dhe funksionon pa ndërprerje deri më tani.
Ndërmarrja e transportit publik në Tetovë ka pesë autobusë të cilët janë blerë me kredi prej 1.2 milion eurove nga Banka Botërore, të cilën e ka marrë Komuna e Tetovës, e cila do të paguhet për 13 vite, me normë interesi prej 3%.
Aktualisht janë katër linja të autobusëve që qarkullojnë. Linja 1 ( UEJL – Pallma Mall –UEJL), Linja 1/A (( UEJL – Pallma Mall -UEJL ), Linja 2 ( UEJL – F. Xhepçisht – UEJL ) dhe Linja 3 ( Reçica e madhe – Pallma Mall – Reçica e madhe). Detaje dhe oraret e linjave mund t’i gjeni duke klikuar KËTU.