Kovaçevski për Ditën e Alfabetit të Gjuhës Shqipe: Është gjuha e vëllait tim
Duke respektuar gjuhët e ndryshme konfirmojmë se jemi shoqëri multietnike funksionale, shembull në rajon dhe Evropë. Këtë e ka theksuar sot kryeministri i vendit, Dimitar Kovaçevski në Akademinë Solemne të sotme me rastin e 115 vjetorit të Ditës së Alfabetit të Gjuhës Shqipe. Kryeministri tha se gjuha shqipe nuk është gjuha e tij amtare, por megjithatë ai shkon shumë mirë me shqiptarët, pasi siç theksoi, “është gjuha e vëllait tim”, transmeton Portalb.mk.
“Sot është një ditë e madhe për shqiptarët tanë dhe një ditë e madhe për historinë tonë të përbashkët… Me njësimin dhe standardizimin e alfabetit të shqipes, u hap rruga që shkrimi shqip të bëhej pjesë e thesarit të pasur të trashëgimisë kulturore botërore”, tha Kovaçevski.
Kovaçevski theksoi se në këtë vend me shekuj janë ushqyer dhe ushqehen gjuhë, fe dhe kultura të ndryshme. Ai tha se një nga veçoritë më të rëndësishme të njohura të Republikës së Maqedonisë së Veriut është karakteri i saj multietnik dhe multikonfesional.
Kovaçevski theksoi se në këtë vend me shekuj janë ushqyer dhe ushqehen gjuhë, fe dhe kultura të ndryshme. Ai tha se një nga veçoritë më të rëndësishme të njohura të Republikës së Maqedonisë së Veriut është karakteri i saj multietnik dhe multikonfesional.
“Edhe pse jo të gjithë flasim të njëjtën gjuhë, historia jonë, rrënjët tona janë të ndërthurura dhe të ndërlidhura. Ne jemi të gjithë të ndryshëm, por në të njëjtën kohë të njëjtë që ndajmë të njëjtat sfida… Vazhdojmë të ndërtojmë një vend ku gjuha amtare ushqehet në shkolla, komuna dhe spitale. Po krijojmë hapësirë për fuqizim dhe valorizim edhe më të madh të vlerave etnike, po i japim hapësirë bashkëjetesës, jo paragjykimeve”, tha Kovaçevski.
Sipas tij, respektimi i diversitetit është parakusht për ndërtimin e një shteti demokratik.
“Prandaj kemi marrë një sërë masash në drejtim të mbështetjes dhe ruajtjes së gjuhës amtare duke themeluar institucione për promovimin e gjuhës amtare”, tha Kovaçevski.
Urime për 22 Nëntorin dërguan edhe presidenti dhe kryetari i Kuvendit.
Presidenti Stevo Pendarovski uroi ditën e Alfabetit të Gjuhës Shqipe, duke thënë se bashkëjetesa është fryt i besimit i cili zë rrënjë atëherë kur njerëzit e respektojnë dhe e mbështesin identitetin e tjetrit.
Kryeparlamentari Talat Xhaferi nga ana tjetër tha se si politikanë përgjegjës, kanë për obligim të ruajnë dhe të përsosin në çdo hap amanetin e përhapjes së gjuhës shqipe.
Presidenti i Shqipërisë, Bajram Begaj qëndroi sot në Manastir në kuadër të manifestimit për 115-vjetorin e Kongresit të Alfabetit të gjuhës shqipe. Begaj i shoqëruar nga liderët shqiptarë vendas foli edhe për rëndësinë e Muzeut të Manastirit, duke i kujtuar autoritetet vendase neglizhencën e treguar deri më tani ndaj muzeut dhe imazhin që reflekton godina e muzeut tash e disa vite.
Kongresi i Manastirit u zhvillua mes 14-22 nëntorit të vitit 1908. Në këtë Kongres u miratua vendimi që të pranohet alfabeti latin me disa ndryshime të shkronjave duke i përshtatur ato për gjuhën shqipe. Kongresi njësoi alfabetin me 36 shkronja latine, që e përdorim edhe sot, duke çuar drejt bashkimit gjuhësor kombëtar të gjithë shqiptarët.
Pjesëmarrësit në kongres ishin figura të dalluara të jetës kulturore e politike mbarëshqiptare. Ndër delegatët më të shquar ishin Gjergj Fishta, Mid’hat Frashëri, Sotir Peci, Ndre Mjeda, Shahin Kolonja, Bajo Topulli, Parashqevi Qiriazi, Fehim Zavalani. Delegat tjetër nga familja Zavalani ishte Izet Zavalani, përfaqësues i Follorinës. I zoti i shtëpisë, Fehim Zavalani, mbajti fjalën hyrëse.
Më 22 nëntor mbushen 115 vite nga Kongresi i Manastirit, nisma kishte ardhur falë konstatimit se njësimi i alfabetit ishte aq i nevojshëm saqë përveç problemit arsimor dhe kulturor kishte kaluar edhe në problem politik për të cilin kërkonte zgjidhje Lëvizja Kombëtare aso kohe.