Gërkovska: Siguria kibernetike është bërë më e rëndësishme se kurrë më parë

By N. D. On 20/09/2023 14:08

Sllavica Grkovska, foto: Qeveria e RMV-së

Me përparimin e shpejtë në teknologji, siguria kibernetike është bërë më e rëndësishme se kurrë më parë dhe zbatimi i procesit të transformimit digjital duhet të merret shumë seriozisht nga të gjitha palët, tha zëvendëskryeministrja përgjegjëse për politika të qeverisjes së mirë, Sllavica Gërkovska në Dialogun rajonal për politikat kibernetike, i cili mbahet sot në Shkup, transmeton Portalb.mk.

Në atë drejtim, tha Gërkovska, është zgjidhja e re e propozuar ligjore për Ligjin për sigurinë e sistemeve të rrjeteve dhe informative dhe transformimin digjital, i cili u shqyrtua dje në Këshillin Nacional për Transformim Digjital të Shoqërisë, dhe i cili parasheh themelimin e një Agjencie, e cila do të jetë përgjegjëse për këtë problem.

Duke folur për kërcënimet hibride që kërcënojnë shoqëritë demokratike dhe minojnë besimin në rajonin e Ballkanit Perëndimor, Gërkovska iu referua sulmeve kibernetike ndaj infrastrukturës së TI-së dhe shërbimeve digjitale, si dhe dezinformatave që shfrytëzojnë dallimet ekzistuese, përhapin frikë tek qytetarët dhe propagandojnë mosbesim në institucionet demokratike.

“Është koha që të gjitha qeveritë në rajon dhe të gjitha palët e interesuara në shoqëritë tona të përqendrohen më shumë në ndërtimin e rezistencës ndaj luftës hibride, sulmeve kibernetike dhe kërcënimeve të tjera që lidhen me ndikimet e dëmshme të huaja dhe fushatat e dezinformimit. Qasja që përfshin të gjitha palët në shoqëri është e vetmja metodë që mund të japë rezultate, prandaj duhet të inkurajohet bashkëpunimi ndërmjet qeverive, mediave dhe shoqërisë civile, si dhe shkëmbimi i praktikave dhe njohurive në nivel rajonal”, përfundoi Gërkovska.

Kujtojmë se Maqedonia e Veriut ishte cak i kërcënimeve të rreme me bomba, por jo vetëm kaq. Nga fundi i vitit 2022 e në vazhdim, sulmet kibernetike kanë ndodhur në faqet e institucioneve shtetërore si Fondi i Sigurimeve Shëndetësore, Qeveri, Ministritë e Bujqësisë dhe Arsimit dhe Shkencës, nga ku janë vjedhur të dhënat e qytetarëve dhe në disa raste për ta sulmuesit kërkuan shpërblim në kriptovaluta.

Nga 26 tetori i vitit 2022 në RMV disa herë është denoncuar se në email-adresat e disa shkollave në vend është dërguar kërcënim për vendosje të bombës. Krahas shkollave të mesme dhe fillore, ka pasur edhe raportime anonime për bomba të vendosura edhe në institucione dhe qendra tregtare. Numri më i madh i kërcënimeve të rreme ka ndodhur në shkurt – madje 439, gjegjësisht vetëm në pesë ditë të javës së punës nuk ka pasur kërcënim me bombë. Në nëntor ka pasur 30 kërcënime, në dhjetor 272, kurse më 1 mars të këtij viti është arritur rekordi – madje 120 shkolla dhe institucione të tjera kanë marrë kërcënim të rremë brenda një dite se është vendosur bombë.

Ndërkohë, sistemi i FSSh-së ishte i padisponueshëm nga 7 shkurti, për dy javë të plota.

Sistemi shërben për qytetarët që të mund të kontrollojnë sigurimin e tyre shëndetësor, zgjedhjen e mjekut amë, ndërsa vetë të punonjësit shëndetësor mund të kontrollojnë informacionet për pacientët e tyre dhe shërbimet tjera.