Filipçe e propozoi Aleksandar Trajanovskin për nënkryetar të ri të LSDM-së
Kandidati për kryetar i komunës së Aerodromit në Shkup, Aleksandar Trajanovski, do të emërohet nënkryetar i ri i Lidhjes Socialdemokrate (LSDM). Kjo u njoftua në konferencën e sotme për shtyp nga kryetari i partisë, Venko Filipçe, duke komentuar ndryshimet e shpallura në udhëheqjen e partisë pas rezultateve të zgjedhjeve lokale, transmeton Portalb.mk.
“Do ta nominoj Aleksandar Trajanovskin, aktualisht anëtar i Bordit Ekzekutiv, për pozicionin e nënkryetarit. Ai është jashtëzakonisht i përkushtuar ndaj partisë. Ai pati një fushatë të shkëlqyer në zgjedhjet lokale dhe tërhoqi shumë vëmendje. Besoj se ky do të jetë një forcim i konsiderueshëm i personelit në këtë nivel të partisë”, tha ai.
Trajanovski ishte kandidati i LSDM-së për kryetar të Komunës së Aerodromit. Ai është specialist i ortopedisë dhe traumatologjisë dhe ish-drejtor i Klinikës Universitare për Traumatologji, sëmundje ortopedike, anestezi dhe reanimacion dhe Qendrës së Kujdesit Intensiv dhe Emergjencave (TOARILUC).
Deri më tani, ai ishte anëtar i Bordit Ekzekutiv të LSDM-së.
Ky ndryshim vjen pasi një nga nënkryetaret e LSDM-së, Ana Çupeska, dha dorëheqjen pas raundit të dytë të zgjedhjeve lokale.
Filipçe njoftoi se sonte do të mbahet mbledhje e Bordit Ekzekutiv të LSDM-së, në të cilën do të shpallë disa nga planet për ndryshime kadrovike dhe politike në parti.
“Po kalojmë me kujdes nëpër këtë proces, për të cilin kërkoj durim nga anëtarët dhe mbështetësit”, tha kreu i LSDM-së.
Kreu i opozitës LSDM mohoi se i kishte ofruar një vend në pozicionet drejtuese të partisë një ish-kryetari komune dhe një mjeku, dhe se ai ishte refuzuar. Ai i vlerësoi këto spekulime si biseda kafeneje të plasuara nga VMRO-DPMNE.
“Kjo është një gënjeshtër absolute. Unë nuk i kam ofruar askujt asnjë pozicion, nuk ka asnjë person të tillë që ka refuzuar ndonjë ofertë. Nuk ka ish-kryetar komune VMRO-DPMNE, në vend që të merret me problemet thelbësore në vend, siç janë arsimi, bujqësia, kujdesi shëndetësor, është e angazhuar në biseda të tilla kafeneje dhe shpërqendrime”, thotë ai.
Kur u pyet nëse ka përçarje në parti, ai tha se jo, por përkundrazi, unitet.
Kryetari i LSDM-së, Venko Filipçe pas zgjedhjeve tha se, do të pasojnë ndryshime politike dhe kadrovike në udhëheqjen e partisë. Ai deklaroi se rezultatet e zgjedhjeve janë një tregues i qartë se ku ka bërë përparim partia dhe ku duhen bërë ndryshime dhe puna të intensifikohet, por se nuk do të japë dorëheqje.