ESHR: Të tejkalohen dobësitë sistematike rreth pagesës së donacioneve për partitë
Raportet e Entit Shtetëror për Revizion tregojnë se nuk ka shkelje të mëdha në shpenzimin e fondeve buxhetore për zgjedhjet presidenciale dhe parlamentare. Vetëm 4 parti nga 60 nuk morën financim, sepse nuk dorëzuan raporte, raporton TV21. Ambasadorët theksuan se mesazhi për zgjedhje të lira dhe demokratike është kyç për çdo sistem, partitë duhet të zbatojnë rekomandimet për organizim më të mirë të zgjedhjeve.
“Në sistemin zgjedhor mbeten ende dobësi që duhet tejkaluar, sidomos në rregullimin e mënyrës së pagesës së donacioneve pas përfundimit ose pas shpalljes së rezultateve përfundimtare të zgjedhjeve. Ligji ynë lejon që pas shpalljes së rezultateve, persona juridikë dhe fizikë të bëjnë donacione, dhe kjo krijon mundësinë që donacionet të drejtohen vetëm te fituesi, dhe jo në mënyrë të barabartë për të gjithë”, tha Maksim Acevski, kryetar i Entit Shtetëror për Revizioni.
Tema e konferencës ishte “Llogaridhënia financiare në zgjedhje”, organizuar nga Enti Shtetëror për Revizion me mbështetje nga Misioni i OSBE-së dhe Programi Zviceran për Mbështetje të Zgjedhjeve, i realizuar nga Fondacioni Ndërkombëtar për Sistemet e Zgjedhjeve. Qëllimi është përmirësimi i përgatitjes institucionale dhe mbikëqyrjes së financimit të fushatave zgjedhore, sidomos para zgjedhjeve lokale të ardhshme.
“Organizimi i zgjedhjeve të lira, të drejta dhe demokratike është shumë i rëndësishëm dhe në këtë drejtim punon Enti Shtetëror për revizion. Ne shpresojmë se rekomandimet e Komisionit të Venecias dhe konkluzionet e revizionit do të merren parasysh në ndryshimet dhe plotësimet e Kodit Zgjedhor”, pohoi Veronika Hulman, Ambasadorja e Zvicrës në Maqedoninë e Veriut.
Agjencia për Shërbime Mediatike Audio dhe Audiovizuele (ASHMAA) më 25 maj publikoi raportet për reklamim të paguar politik (RPP) të emetuara gjatë rrethit të dytë të zgjedhjeve presidenciale dhe për zgjedhjet parlamentare 2024.
Kujtojmë se analiza “Autorizim diskrecional gjatë financimit të reklamimit të paguar politik” e Qendrës për Menaxhim me Ndryshimet, tregonte se shuma milionëshe nga buxheti i RMV-së ndahen për reklamim të paguar politik në mungesë të procedurës dhe kritereve të qarta, me çka lihet hapësirë për keqpërdorime.
Rekomandimi i tyre është që nëse nuk shfuqizohet reklamimi i paguar politik, atëherë duhet të rregullohet statusi i mediave elektronike në kuptimin që t’i kenë të gjitha obligimet sikur edhe radiodifuzerët, që të mund t’i kenë të drejtat e njëjta si radiodifuzerët.