U publikua raporti për reklamimin e paguar politik në zgjedhjet e fundit presidenciale dhe parlamentare në Maqedoninë e Veriut
Agjencia për Shërbime Mediatike Audio dhe Audiovizuele (ASHMAA) i publikoi raportet për reklamim të paguar politik (RPP) të emetuara gjatë rrethit të dytë të zgjedhjeve presidenciale dhe për zgjedhjet parlamentare 2024, raporton MIA.
Raporti i Agjencisë përmban 22 faqe për zgjedhjet parlamentare, ndërsa raporti për zgjedhjet parlamentare ka 88 faqe.
Në rrethin e dytë të fushatës zgjedhore për zgjedhjet presidenciale, gjithsej 57 transmetues (32 televizione dhe 25 radio) kanë lidhur marrëveshje me dy pjesëmarrës në fushatën zgjedhore.
“Nga 10 televizionet nacionale, më së shumti reklama emetuan Kanal 5 (24 orë 1 minut dhe 32 sekonda), Siteli (16 orë 25 minuta dhe 16 sekonda) dhe Alfa (14 orë 24 minuta dhe 43 sekonda), përderisa nga katër radiot nacionale më së shumti reklama kishin Antena 5 (8 orë 31 minuta dhe 40 sekonda) dhe Kanal 77 (4 orë 32 minuta dhe 7 sekonda)”, thuhet në raportin e ASHMAA-së.
Për kandidatin për president Stevo Pendarovski ishin emetuar gjithsej 160 orë 58 minuta dhe 32 sekonda RPP (128 orë 48 minuta dhe 43 sekonda në TV dhe 32 orë, 9 minuta dhe 49 sekonda në radio), përderisa për kandidaten Gordana Siljanovska Davkova janë emetuar gjithsej 122 orë dhe 22 sekonda RPP (75 orë 14 minuta dhe 5 sekonda në TV dhe 46 orë 46 minuta dhe 17 sekonda në radion).
Sa i përket zgjedhjeve parlamentare, në 68 transmetues (39 televizione dhe 29 radio) të cilët lidhën marrëveshje me pjesëmarrësit në fushatën zgjedhore ishin emetuar gjithsej 567 orë 43 minuta dhe 31 sekonda reklamim i paguar politik.
“Nga 11 televizionet nacionale, volumin më të madh e kishin Alsat-M (44 orë 12 minuta e 27 sekonda), Kanal 5 (35 orë 58 minuta e 4 sekonda) dhe TV 21-M (33 orë 5 minuta e 57 sekonda), përderisa nga 4 radiot nacionale më së shumti reklama emetuan Antena 5 (15 orë 22 minuta e 35 sekonda) dhe Kanal 77 (10 orë, 6 minuta e 46 sekonda)”, thuhet në raportin e ASHMAA-së.
Kujtojmë se analiza “Autorizim diskrecional gjatë financimit të reklamimit të paguar politik” e Qendrës për Menaxhim me Ndryshimet, tregonte se shuma milionëshe nga buxheti i RMV-së ndahen për reklamim të paguar politik në mungesë të procedurës dhe kritereve të qarta, me çka lihet hapësirë për keqpërdorime.
“Kodi Zgjedhor i lejon diskrecion të plotë KSHZ-së gjatë pagesës së shpenzimeve për reklamim të paguar politik, pasi që edhe pse ligji përmban rregulla të përgjithshme për shpërndarjen e atyre harxhimeve, nuk ka kritere konkrete dhe procedurë nëpërmjet të cilës do të konstatohet nëse shpenzimet të cilat janë paguar janë bërë realisht”, thuhet në konkluzat e analizës.
Rekomandimi i tyre është që nëse nuk shfuqizohet reklamimi i paguar politik, atëherë duhet të rregullohet statusi i mediave elektronike në kuptimin që t’i kenë të gjitha obligimet sikur edhe radiodifuzerët, që të mund t’i kenë të drejtat e njëjta si radiodifuzerët.