Dita e ARM-së: Edhe pse jemi një vend i vogël, ne kemi treguar se jemi të denjë si komb dhe si ushtri të ecim krah për krah në lidhjen më të fortë politike
Mirënjohja më e lartë për pjesëtarët e armatës nuk janë urdhrat dhe medaljet, por besimi që kanë qytetarët e Maqedonisë në to. Ushtria maqedonase dha një kontribut dhe ndihmë të madhe gjatë fatkeqësive natyrore që prekën vendet tona partnere – tërmetet në Turqi, përmbytjet në Slloveni, dhe qëndroi në mbështetje të popullit ukrainas. Ushtria është rojtari i gjithçkaje që e mban të bashkuar shoqërinë maqedonase. Kështu u bë e ditur sot në shënimin e 18 gushtit – Ditës së Ushtrisë, transmeton Portalb.mk.
Në ceremoninë në të cilën ishte i pranishëm i gjithë kryesia shtetërore dhe ushtria dhe që u mbajt në stadiumin ushtarak në parkun e qytetit në Shkup, kryetari i shtetit dhe komandanti suprem i Forcave të Armatosura, Stevo Pendarovski, tha se qytetarët e Maqedonisë sot janë më të sigurt për shkak të mburojës së sigurisë së Aleancës së NATO-s dhe pjesa më e spikatur e kësaj mburoje janë pjesëtarët e Armatës.
“Që nga fillimi, si vend, ne kemi kontribuar në përpjekjet e përbashkëta për të mbështetur Ukrainën në luftën e saj kundër pushtimit rus. Ne jemi ndër pesë shtetet anëtare të Aleancës për sa i përket raportit midis prodhimit të brendshëm bruto dhe ndihmës teknike ushtarake dhe materiale që i ofrojmë Ukrainës gjatë kësaj periudhe kritike. Ne duhet të vazhdojmë të investojmë në mbrojtjen dhe sigurinë tonë”, tha presidenti Pendarovski.
Synimi është, siç tha ai, të kemi një Ushtri që jo vetëm të përmirësohet strukturisht, por edhe të modernizohet me mjete luftarake dhe pajisje moderne për mbrojtjen e atdheut.
Në këtë ceremoni foli edhe kryeministri Dimitar Kovaçevski, i cili theksoi se investimi në mbrojtje është investim në sigurinë e qytetarëve dhe sigurinë kombëtare.
Këtë vit, siç tha Kovaçevski, buxheti i mbrojtjes është 1,85 për qind e BPV-së dhe është 24 për qind më i lartë se buxheti i vitit të kaluar.
“Lidhja e fortë dhe besimi dhe respekti i ndërsjellë për Armatën nga qytetarët na inkurajon, por edhe na jep detyrë në të ardhmen si Qeveri që të bëjmë gjithçka, në mënyrë që Ushtria të ketë gjithçka që i nevojitet për të vazhduar të zhvillohet fuqishëm. Integrimi në strukturat evropiane është në krye të prioriteteve. Para nesh është realizimi i një qëllimi tjetër strategjik, anëtarësimi në BE”, tha kryeministri.
Ministrja e Mbrojtjes Sllavjanka Petrovska theksoi se kjo ditë shënohet në kujtim dhe lavdi të batalionit të parë partizan “Mirçe Acev”, i cili u konstituua pikërisht 80 vjet më parë në këtë ditë në shpatet e malit Sllavej. Ky, siç tha Petrovska, ishte simboli dhe shpallja e parë e shtetësisë maqedonase, që më pas u konfirmua nga Seanca e Parë e KAÇKM-së.
“Anëtarësimi në NATO është ndoshta njohja më e madhe që mund t’u bëjmë rreth 200 ushtarëve që themeluan batalionin “Mirce Acev”, por edhe të gjithë heronjve që dhanë jetën në mbrojtje të lirisë gjatë Luftës së Dytë Botërore në betejë me fashizmin, së bashku me shumë partizanë nga e gjithë Evropa dhe ushtritë aleate. Ne kemi treguar se jemi të denjë si komb, si shtet dhe si ushtri të ecim krah për krah në bashkimin më të fortë politik të sotëm. Ne treguam se vlerat e tyre i jetojmë si tonat dhe se jemi trashëgimtarë të denjë të sakrificës së tyre dhe të idealeve për të cilat ata luftuan, si liria dhe solidariteti”, tha Petrovska.
Ajo shtoi se në kohë krize globale ne qëndruam krah për krah me të gjitha kombet në nevojë. Ne ndihmuam Turqinë, Slloveninë dhe Ukrainën.
“Edhe pse jemi një vend i vogël, jemi njerëz me zemër të madhe dhe këtë e kemi treguar në Turqi dhe Slloveni, duke ndihmuar kombet tona mike të përballen me pasojat e fatkeqësive natyrore. Ne gjithashtu qëndruam në mbështetje të popullit ukrainas. Ne e ndihmuam Ukrainën jo sepse duhet, por sepse është mënyra e vetme për të qenë në anën e duhur të historisë”, tha Petrovska.
Presidenti Stevo Pendarovski gjatë ceremonisë së sotme i shpërbleu 13 pjesëtarë të Armatës me medalje për pjesëmarrje në operacione humanitare apo paqësore jashtë territorit të vendit, ndërsa 60 pjesëtarë të Armatës që morën pjesë në përballjen me pasojat e tërmetit katastrofik në Republikën e Turqisë u dha medalje për guxim.
Po ashtu, presidenti shpalli dekretet për gradimin në gradën gjeneral, ndërsa ministrja Petrovska gradat dha gradën kolonel.
Në varrezat e qytetit “Butel” në Shkup, me nderime ushtarake u vendosën lule në varrezat partizane mbi varrin e presidentit të vdekur Boris Trajkovski, ish-presidentit Kiro Kligorov dhe mbi varrin e gjeneralit Mihailo Apostolski.