Stuhi reagimesh nga blegtorët në RMV, kërkojnë që AUV të tregojë se cilat fabrika qumështi po fusin “kimikate” në djathë
Stuhi reagimesh midis fermerëve të bagëtive, shkaktoi lajmi nga Agjencia e Ushqimit dhe Veterinarisë se në dhjetë qumështore u gjetën parregullsi në lidhje me cilësinë dhe etiketimin e produkteve të qumështit që shiten në supermarkete, raporton “Nezavisen“.
Siç raporton media, blegtorët i thanë ministrit Cvetan Tripunovski tre muaj më parë, kur ai ishte në Manastir, se në vend të qumështit, qytetarët pinin “kimikate”, dhe tani, për shkak të seriozitetit të problemit, veçanërisht me përdorimin e vajit të palmës në produktet e qumështit, blegtorët kërkojnë që AUV të zbulojë publikisht të gjitha qumështoret dhe t’u heqë të drejtat për të prodhuar produkte të qumështit, e jo, siç thonë ata, t’i ndëshkojë me gjoba qesharake prej disa mijëra eurosh.
Blegtori Borçe Buçinski nga fshati Mogillë thotë se blegëtorët duhet të mbrohen, jo të shkatërrohen, se atyre duhet t’u paguhen subvencionet për kokë për vitin 2025, se atyre duhet t’u paguhet premia e qumështit nga qershori e tutje, dhe se ministri Cvetan Trupunovski duhet të japë dorëheqje për shkak të këtij skandali që po ndikon në shëndetin e qytetarëve.
“Dy ose më shumë muaj më parë, thamë para mediave dhe në takimin me ministrin se produktet e qumështit, djathrat, djathërat e verdhë, kosi, kanë gjithçka përveç qumështit, i cili nuk është aty. Gjithçka është vaj palme. Por askush nuk e beson. Tani kanë zbuluar se produktet e qumështit përmbajnë 1 përqind yndyrë qumështi. Pse gënjeni, pse po i helmoni njerëzit, madje edhe ne blegtorët e hamë atë edhe pse prodhojmë qumësht të pastër. Pse heshtni kur të gjithë e hanë atë qumësht. Çmimi i qumështit në vendin tonë po bie, çmimet në tregje po rriten. Ndërsa qumështi me shkumë po shitet. Fatkeqësisht, të gjithë e konsumojmë. Turp për shtetin. Le të na paguhen subvencionet, le të stabilizohet çmimi i qumështit të papërpunuar dhe ministri të japë dorëheqjen”, bën thirrje blegtori Buçinski.
Siç informoi AUV dje, në prag të Ditës Botërore të Qumështit, 1 qershor, nga 45 mostra të qumështit dhe produkteve të qumështit të marra dhe të analizuara, u përcaktua se mostrat e analizuara nuk përputheshin me dispozitat e Rregullores për cilësinë e produkteve bujqësore, gjegjësisht, testet përcaktuan se produktet përmbanin një përqindje më të ulët të yndyrës së qumështit sesa ajo e deklaruar. Në një kompani, nga e cila u morën 22 kilogramë djathë i imët si mostra, u përcaktua se në vend të 20 përqind, siç ishte deklaruar, djathi përmbante vetëm 1 përqind yndyrë qumështi. Për këtë, kompania u gjobit me 3.500 euro. Tetë kompani të tjera, përfshirë importues dhe prodhues, u gjobitën me nga 1.050 euro secila për mashtrim të ngjashëm ndaj konsumatorit, pra një përqindje më të ulët të yndyrës së qumështit sesa ajo e deklaruar. Një tjetër bulmetore që përdori vaj palme në vend të yndyrës së qumështit u gjobit me 1.300 euro nga AUV. Gjysmë ton (500 kilogramë) “produkt qumështi” u sekuestrua nga kjo bulmetore dhe u asgjësua në mënyrë të sigurt në një deponi.