RMV, për arsim më kualitativ duhen më shumë financa dhe riorganizim të rrjetit shkollor
Me rritjen e burimeve dhe riorganizimin e rrjetit të shkollave fillore mund të përmirësohet cilësia e arsimit. Ky ishte konkluzioni kryesor i forumit të sotëm ndërkombëtar, ku morën pjesë politikëbërës, ekspertë dhe praktikues, të cilët diskutuan mësimet e nxjerra dhe faktorët kryesorë të suksesit nga riorganizimi i rrjetit të shkollave në vendet evropiane, njofton UNICEF, transmeton Portalb.mk.
Forumi u organizua nga Ministria e Arsimit dhe Shkencës, UNICEF-i dhe Banka Botërore për të marrë informacione që do të ndihmojnë në realizimin e punës aktuale lidhur me optimizimin e rrjetit të shkollave në Maqedoninë e Veriut.
UNICEF sqaron se është duke u zbatuar iniciativa për optimizimin e rrjetit të shkollave fillore, e cila përfshin edhe rishikimin e formulës për financimin e arsimit fillor në Maqedoninë e Veriut. Dhjetë pilot komuna aktualisht po marrin mbështetje për zbatimin e planeve lokale të optimizimit në konsultim të ngushtë me nxënësit, prindërit dhe mësuesit e shkollave.
“Optimizimi i rrjetit të shkollave në bashkëpunim me komunat është një nga aktivitetet prioritare të Ministrisë së Arsimit dhe Shkencës”, tha ministri i Arsimit dhe Shkencës, Jeton Shaqiri.
“Komunat nuk duhet të shqetësohen për optimizimin, sepse së bashku do të punojmë me to për ta realizuar me sukses këtë proces. Në rastet kur nuk kemi numër të mjaftueshëm nxënësish për shkak të uljes së natalitetit apo migrimit, do të konsultohemi me komunitetin lokal për të identifikuar nevojat për shndërrimin e hapësirës së pashfrytëzuar të shkollës për të plotësuar nevojat e qytetarëve nga shërbimet e tjera sociale”, shtoi ai.
Përfaqësuesja e UNICEF-it Patricia DiGiovanni tha se rritja e fondeve publike dhe investimeve në arsim është një parakusht për përmirësimin e cilësisë dhe gjithëpërfshirjes së arsimit për të gjithë fëmijët.
“Ne duhet të nxjerrim më shumë nga investimet e bëra në arsim dhe për ta arritur këtë, duhet të këmbëngulim në reformat e kurrikulës që sigurojnë që fëmijët të fitojnë njohuritë, aftësitë e nevojshme për të lulëzuar në shoqërinë moderne,” theksoi DiGiovanni.
Bojana Naceva, specialiste e arsimit të lartë nga Banka Botërore, thotë se aktualisht po punohet për finalizimin e formulave të financimit për arsimin fillor dhe të mesëm dhe metodologjitë për optimizimin e rrjetit shkollor në arsimin fillor.
“Përfitimet kryesore që mund të presim si rezultat: me formulat e reja financat do të ndjekin nxënësin dhe nevojat e tij, në një mënyrë që nxënësit më vulnerabël të jenë prioritet; ato do të stimulojnë dhe shpërblejnë shkollat që punojnë mirë dhe me përgjegjësi bazuar në kritere të qarta dhe do të përmirësojnë efikasitetin, gjë që do të lirojë më shumë hapësirë për investime në mjedisin mësimor dhe mbështetje për mësuesit”, thotë Naceva.
Vendi po përballet me një krizë arsimore, me arritjet e nxënësve nën mesataren e Ballkanit Perëndimor, BE-së dhe OECD-së, sipas UNICEF. Ndryshimet e mëdha demografike, duke përfshirë rënien e nivelit të lindjeve, shtimin e migrimit dhe urbanizimit pa rregullime të mëdha në rrjetin e shkollave fillore, kanë rezultuar në mosshfrytëzimin e hapësirës dhe stafit shkollor në disa zona. Në të kundërt, shkollat e tjera kanë shumë nxënës dhe mungesë të stafit, kështu që ato duhet të organizojnë mësime në dy ndërrime – gjë që mund të ndikojë në rezultatet e të nxënit.