RMV, ndihmë britanike për forcimin e kapaciteteve të NATO-s të Ministrisë së Punëve të Jashtme
Ministri i Punëve të Jashtme, Bujar Osmani dhe Ambasadori i Mbretërisë së Bashkuar, Metju Loson, nënshkruan Memorandum Bashkëpunimi për realizimin e projektit për mentorimin dhe ngritjen e kapaciteteve të Drejtorisë për NATO-n dhe Çështjet Politike dhe të Sigurisë pranë Ministrisë së Punëve të Jashtme, transmeton Portalb.mk.
“Me nënshkrimin e sotëm të Memorandumit, në mënyrë shtesë forcojmë aleancën tonë në NATO dhe e pasurojmë kornizën kontraktuale ndërmjet dy vendeve. Mbretëria e Bashkuar, si aleati dhe miku ynë i rëndësishëm, kontribuon në forcimin dhe zhvillimin e mëtejshëm të kapaciteteve të Ministrisë së Punëve të Jashtme, me qëllim të realizimit më efektiv të rolit tonë politik dhe koordinues në lidhje me çështje të ndryshme që lidhen me anëtarësimin e Maqedonisë së Veriut në Aleancë”, theksoi Osmani.
“Mbretëria e Bashkuar ishte partner i vazhdueshëm në mbështetjen e integrimit të Maqedonisë së Veriut në aleancën e NATO-s. Ky projekt është edhe një shembull tjetër i mbështetjes së vazhdueshme të Mbretërisë së Bashkuar për Maqedoninë e Veriut si aleate e NATO-s, me qëllim të zhvillimit të kapaciteteve dhe aftësive në mënyrë që ajo të vazhdojë të kontribuojë dhe të përmbushë rol më të rëndësishëm si anëtare e NATO-s”, tha ambasadori Loson, duke shtuar se donacionet e Mbretërisë së Bashkuar në formën e pajisjeve, sigurimit të instruktorëve të trajnimit, dërgimit të këshilltarëve dhe pjesëmarrjes në stërvitjet e përbashkëta kontribuuan në përmbushjen e qëllimit të përbashkët – sigurimin e paqes, stabilitetit dhe sigurisë në rajon.
Njëherit, ai shtoi se këto përpjekje janë dëshmi e përkushtimit të të dy vendeve për të garantuar mbrojtjen kolektive dhe sigurinë e Aleancës së NATO-s.
Projekti është paraparë të zgjasë deri në mars të vitit 2024 dhe duke dërguar ekspert rezident pritet të kontribuojë në pjesëmarrjen e shkathët dhe me kompetencë të Ministrisë së Punëve të Jashtme si dhe ekspertëve civilë në punën e strukturave të NATO-s. Gjithashtu, projekti duhet të kontribuojë në gatishmërinë e përgjithshme të institucioneve tona për të siguruar menaxhim shumë efektiv dhe efikas të roleve politike në fushën e politikës së sigurisë dhe çështjeve të sigurisë.
Kujtojmë se me 11 shtator, ministret e Mbrojtjes të Maqedonisë së Veriut, Slavjanka Petrovska dhe të Portugalisë, Maria Helena Carreiras, nënshkruan Marrëveshjen e parë për bashkëpunim dypalësh të mbrojtjes ndërmjet dy vendeve, e cila do të intensifikojë bashkëpunimin maqedono-portugez në mbrojtje.
Më 11 dhe 12 korrik të këtij viti u mbajt Samiti i NATO-s, ku udhëheqësit e vendeve të NATO-s thanë se shtetet e Ballkanit Perëndimor janë të një rëndësie strategjike për aleancën dhe konfirmuan përkushtimin e tyre për sigurinë dhe stabilitetin e këtij rajoni.
Në ditën e parë të samitit që mbajtën në Vilnius të Lituanisë, ata thanë se i mbështesin reformat që i forcojnë aspiratat e vendeve të rajonit drejt NATO-s dhe Bashkimit Evropian.
Ata vlerësuan se Ballkani Perëndimor kërkon vëmendje dhe përkushtim të vazhdueshëm nga NATO-ja dhe komuniteti ndërkombëtar për t’u përballur me këto sfida.