RMV, mbi 50 mijë qytetarë morën vaksinën kundër gripit sezonal
Ministria e Shëndetësisë bën të ditur se mbi 50 mijë qytetarë kanë marrë vaksinën e gripit sezonal, ndërsa për vaksinim falas deri më tani kanë aplikuar 59 mijë qytetarë, transmeton Portalb.mk.
“Vaksinimi kundër gripit sezonal kryhet vazhdimisht në qendrat shëndetësore publike dhe qendrat shëndetësore dhe vaksinimi falas mbulon grupet e mëposhtme të rrezikuara: të moshuarit (mbi 65 vjeç), personat me sëmundje kronike, punonjësit e shëndetësisë, gratë shtatzëna, fëmijët nga 6 muaj deri në 5 vjeç, si dhe personat e vendosur në institucionet e mbrojtjes sociale të të moshuarve dhe personat e punësuar në institucionet e mbrojtjes sociale të të moshuarve”, njoftojnë nga Ministria e Shëndetësisë.
Vaksinimi kundër gripit sezonal,shtojnë nga kjo Ministri, është masa më efektive për parandalimin e gripit, i cili parandalon shfaqjen e formave më të rënda, ndërlikimet dhe vdekjen, veçanërisht tek grupet e rrezikuara. Me futjen e vaksinimit si masë mbrojtëse, janë arritur rezultate më të mira në historinë e mjekësisë. Njihet si një nga masat shëndetësore më të suksesshme dhe më ekonomike në botë që krijon imunitet kolektiv.
Qytetarët e interesuar mund të regjistrohen për vaksinim falas duke plotësuar aplikacionin në ueb-faqen zyrtare – vakcinacija.mk, dhe më pas të marrin informacion me SMS për datën, kohën dhe vendin e saktë të vaksinimit.
Ndryshe, vaksinimi në Maqedoninë e Veriut filloi më 25 tetor.