Reagime në rajon pas deklaratës së rrezikshme të ministrit serb të Mbrojtjes Vuçeviq për Kosovën
Pas propagandës nxitëse të ministrit serb të Mbrojtjes dhe kryetarit të Partisë Përparimtare Serbe, Millosh Vuçeviq, ndaj Maqedonisë së Veriut dhe Malit të Zi, me reagime dolën zyrtarë të lartë shtetërorë nga vendi, Mali i Zi dhe Shqipëria, transmeton Portalb.mk.
Ndaj deklaratës së Vuçeviqit ka reaguar ministri i Jashtëm i Maqedonisë, Bujar Osmani, i cili në rrjetin social Twitter ka shkruar se vendi i hedh poshtë ndërhyrjet dhe deklaratat e papërshtatshme të zyrtarëve nga vendet fqinje.
“Ne qëndrojmë për stabilitet dhe bashkëpunim rajonal, duke përfshirë Serbinë dhe Kosovën. Pritet sqarim nga ministri i Mbrojtjes i Serbisë”, ka shkruar ministri Bujar Osmani.
North Macedonia rejects interference and unsuitable remarks from neighboring officials. We stand for regional stability and cooperation, including with Serbia and Kosovo. Awaiting clarification from Serbia's Defence Minister.
— Bujar Osmani (@Bujar_O) August 21, 2023
Pas reagimit të Osmanit, ministri serb i Mbrojtjes në vend që t’i kërkonte falje Maqedonisë për ndërhyrje në punët e brendshme dhe të jashtme të vendit, Vuçeviq u grind me Bujar Osmanin në rrjetin social Twitter.
“Përkundër të gjitha raportimeve dashakeqe dhe të pabaza në media, Serbia vepron si një partner i përgjegjshëm, i besueshëm dhe i parashikueshëm i të gjithë fqinjëve tanë. Mbështetja jonë për integritetin territorial të të gjitha shteteve anëtare të OKB-së është e pakushtëzuar. Megjithatë, ne nuk mund të lavdërojmë shpërfilljen e askujt për integritetin tonë territorial. Ngjarjet e fundit kanë vërtetuar paralajmërimet tona se UDI e Kosovës* nuk është një rast sui generis dhe do të goditet në kokë herët a vonë. Askush në Serbi nuk mburret për këtë, vetëm po i tregojnë faktet”, ka shkruar ministri serb Vuçeviq.
Despite all the malicious and ill-founded media reporting, #Serbia acts as a responsible, reliable and predictable partner to all our neighbors. Our support for the territorial integrity of all UN member states is unconditional. Yet we cannot praise anyone's disrespect for our… https://t.co/6lyyCB8rdM
— Милош Вучевић (@milos_vucevic) August 21, 2023
Kryeministri i Maqedonisë Dimitar Kovaçevski mbrëmë ka pasur takim me presidentin serb Aleksandar Vuçiq, pas së cilës Kovaçevski ka shkruar në profilin e tij në Facebook se në bisedë Vuçiqin e ka siguruar se popullin maqedonas dhe shtetin maqedonas e konsideron jashtëzakonisht miqësor dhe se nëse ndonjë qytetar maqedonas është i ofenduar nga çdo mesazh nga shteti serb, Vuçiq do të kërkojë falje personalisht.
Ndaj deklaratës së ministrit serb të Mbrojtjes ka reaguar edhe presidenti malazez Jakov Milatoviq, i cili ka theksuar se është e papranueshme përpjekja për të ndërhyrë me aktorë të huaj në formimin e qeverisë së re malazeze.
Milatoviq ka theksuar se përbërja e sapozgjedhur e Kuvendit të Malit të Zi është shprehje e vullnetit të qytetarëve të Malit të Zi, të cilët janë bartës të sovranitetit të shtetit. Ai shtoi se pret që formimi i qeverisë së re të bazohet në vullnetin e shprehur lirisht të qytetarëve në zgjedhjet parlamentare, si dhe në prioritetet programore që do të mundësojnë përshpejtimin e anëtarësimit të Malit të Zi në BE.
Deklaratës së ministrit serb të Mbrojtjes, i cili vlerësoi se kërcënimet ndaj stabilitetit dhe integritetit territorial të Maqedonisë së Veriut dhe Malit të Zi janë të rrezikshme dhe të papranueshme ka reaguar edhe kryeministri shqiptar Edi Rama, duke theksuar se “Evropa e madhe” është e vetmja e ardhme e tre vendeve.
Rama i kujtoi Vuçeviqit se Shqipëria, Mali i Zi dhe Maqedonia e Veriut si vende anëtare të NATO-s janë plotësisht të përkushtuara për sigurinë reciproke dhe integritetin territorial.
Threats against the stability and integrity of North Macedonia and Montenegro are dangerous and unacceptable. Let's not forget that Albania, North Macedonia and Montenegro are NATO allies fully dedicated to the security and territorial integrity of one another. We have achieved…
— Edi Rama (@ediramaal) August 21, 2023
Reagimet e zyrtarëve të lartë shtetërorë nga rajoni vijnë pasi ministri serb i Mbrojtjes tha se njohja e Kosovës do të t’ju bie në kokë Maqedonisë dhe Malit të Zi.
“A po flenë të qetë miqtë tanë në Maqedoninë e Veriut? A fleni të qetë? Ata mendojnë se janë në Aleancën e NATO-s dhe se i kanë zgjidhur problemet e tyre… Kur u bënë anëtarë të asaj sigurie kolektive, pra të Aleancës së NATO-s, mendojnë se i kanë zgjidhur të gjitha problemet dhe se asgjë nuk mund t’u ndodhë më. Duhet të shikosh çfarë ka në histori, të kuptosh pak rrethanat e tjera dhe të kuptosh se çfarë po ndodh në oborrin e shtëpisë së tyre. Ne nuk duam të udhëheqim politikën e tyre, kjo është çështje e tyre. Por mund të themi se 25 për qind e shqiptarëve kanë 50 për qind të pushtetit në Maqedoninë e Veriut. Nëse është “ok” për maqedonasit, është “ok” edhe për ne, vetëm se padyshim do të keni një politikë që ata të mos e shohin Maqedoninë si vendin e tyre”, tha Vuçeviq në një deklaratë me të cilën ndërhyn në çështjet e brendshme të Maqedonisë.