Rregulla të reja për kreditë në Maqedoninë e Veriut, kreditë për banim do të duhet të shlyhen brenda 25 vitesh
Banka Popullore vendos rregulla të reja për bankat gjatë miratimit të kredive për qytetarët. Kështu, nga 1 dhjetori ulet niveli maksimal i borxhit, përkatësisht raporti ndërmjet këstit mujor dhe pagës së kredimarrësit ulet për 5 pikë përqindjeje, raporton TV21. Ose, nga 50 për qind e pagës sa është aktualisht, kësti maksimal mujor për shlyerjen e kredive në denarë nuk do të guxojë të jetë më i lartë se 45 për qind e të ardhurave të tyre mujore. Për kreditë në valutë të huaj, ulet nga 45 në 40 për qind. Ulen edhe afatet për shlyerjen e kredive. Për kreditë për banim, nga 30 në maksimum 25 vjet.
“Me ndryshimet, vlera maksimale e treguesit DSTI ulet për 5 pikë përqindjeje – nga 50% në 45% për kreditë në denarë dhe nga 45% në 40% për kreditë me komponent valutor. DSTI tregon se sa pjesë e të ardhurave mujore mund të përdoret për shlyerjen e kredive. Për kreditë për blerjen e parë të banesës vetjake, kufijtë mbeten të pandryshuar – përkatësisht 50% dhe 45%. Në të njëjtën kohë, afati maksimal për shlyerjen e kredive për banim ulet nga 30 në 25 vjet, ndërsa për kreditë konsumatore hipotekare nga 20 në 15 vjet. Për kreditë për blerjen e parë të banesës vetjake, afati mbetet 30 vjet”, tha BPRM.
Qëllimi, sipas Bankës Popullore, është që në mënyrë parandaluese, në kushte të një sistemi bankar të shëndetshëm dhe stabil, të kufizohen rreziqet nga mbingarkesa e tepërt me borxhe e familjeve.
“Banka Popullore për herë të parë i vendosi këto masa makroprudenciale në korrik të vitit 2023, ndërsa vendosja e tyre u forcua më tej nga dhjetori i vitit 2025. Të dhënat e deritanishme tregojnë përmirësim të strukturës së kreditimit të ri, me ulje të kreditimit të familjeve me ngarkesë më të lartë borxhi. Prandaj, vendosja shtesë e masave ka karakter parandalues dhe është e orientuar drejt kufizimit në kohë të rreziqeve potenciale nga mbingarkesa e tepërt me borxhe, para se ato të materializohen”, tha BPRM.
Sipas bankës qendrore, ndryshimet miratohen në kushte të një sistemi bankar të shëndetshëm dhe stabil, pa praninë e rreziqeve sistemike, ndërsa cilësia e portofolit të kredive të personave fizikë vazhdon të përmirësohet. Aktiviteti kreditor ndaj personave fizikë vazhdon të rritet. Kështu, në gjysmën e parë të këtij viti, rritja vjetore e kredive për personat fizikë ka arritur në 12,2%, krahasuar me 11,2% në vitin 2025. Rritja më e lartë është vërejtur te kreditë për banim, prej 16,6%.