Osmani në kuadër të OSBE-së me nëntë pika për deeskalimin dhe normalizimin e situatës në veri të Kosovës
Kryesuesi i OSBE-së, ministri i Jashtëm i Maqedonisë së Veriut Bujar Osmani, ka publikuar plan nëntë pikësh për deeskalimin dhe normalizimin e tensioneve në veri të Kosovës, transmeton Portalb.mk.
Plani synon arritjen e paqes dhe stabilitetit të qëndrueshëm në veri të Kosovës dhe kthimin e serbëve të Kosovës në institucione dhe procese demokratike.
Këto janë nëntë pikat:
- Kosova dhe Serbia të riаfirmojnë angazhimin e tyre ndaj Marrëveshjes Themelore dhe Protokollit të Ohrit.
- Kosova duhet të tërheqë forcat e saj speciale policore, kurse Serbia duhet të ulë gatishmërinë luftarake të forcave të armatosura.
- Policisë së Kosovës, së bashku me forcat e KFOR-it dhe EULEX-it, duhet t’i mundësohet që të kujdesen plotësisht për rendin dhe sigurinë e vendit.
- Të anulohen protestat dhe të vihen në funksion shërbimet komunale për funksionimin normal të jetës shoqërore dhe njëkohësisht t’u lejohet qasje punonjësve në komuna.
- Kryetarët të japin dorëheqje deri në verën e këtij viti, duke i hapur rrugën zgjedhjeve të parakohshme komunale.
- Zgjedhjet e parakohshme komunale të mbahen këtë vit.
- OSBE do të mbështesë procesin zgjedhor, përmes mbështetjes teknike të autoriteteve kosovare që do të organizojnë zgjedhjet, duke forcuar legjitimitetin dhe besimin ndërmjet komuniteteve.
- OSBE do t’i angazhojë të rinjtë në programet dhe proceset e pajtimit.
- OSBE-ja do të vë në dispozicion kapacitetet e saj për të mbështetur zbatimin, me vullnet të mirë nga të dyja palët, e dispozitave të dakorduara dhe vazhdimin e dialogut.
Ndryshe, serbët lokalë që nga 29 maji protestojnë rregullisht në Zveçan, Leposaviq dhe Zubin Potik, duke kundërshtuar hyrjen e kryetarëve të rinj shqiptarë në ndërtesat komunale. Më 29 maj, protesta kaloi në dhunë, mes pjesëtarëve të misionit të NATO-s në Kosovë, KFOR dhe protestuesve serbë. Ndërkombëtarët kanë bërë thirrje të vazhdueshme për marrjen e hapave drejt uljes së tensioneve. Është kërkuar dhe mbajtja e zgjedhjeve të reja në veri, për këtë presidentja e Kosovës dhe kryeministri kanë dhënë shenja se kjo mund të ndodh.