Organizatat ndërkombëtare për lirinë e medias dolën në mbështetje të IRL-së
Organizata evropiane Media Freedom Rapid Response, në koordinim me organizata të tjera si Qendra Evropiane për Lirinë e Medias, Federata Evropiane e Gazetarëve, Rrjeti SafeJournalists dhe të tjera, lëshoi një deklaratë në mbështetje të Laboratorit i reporterëve hulumtues (IRL) për vendimin e gjykatës civile në rastin Koço Angjushev dhe kompanisë “Brako” kundër IRL-së dhe kryeredaktores Sashka Cvetkovska, transmeton Portalb.mk.
Gjykata Themelore Shkup 2 e dënoi portalin IRL për shpifje ndaj biznesmenit Koço Angjushev në emisionin “Konspiracion kundër ajrit”, pa i dhënë mundësi as të përgjigjet apo t’i dërgojë pyetje. IRL u urdhërua t’i paguajë Angjushevit një shumë simbolike prej një euro si dëmshpërblim, si dhe të mbulojë shpenzimet gjyqësore të të dyja palëve.
Në njoftimin e Media Freedom Rapid Response, thonë se aktgjykimi dhe më konkretisht shpjegimi i gjyqtarit se IRL në fakt nuk përfaqëson një media, paraqet shkelje të standardeve ndërkombëtare, mosnjohje të interesit publik të produktit gazetaresk të IRL dhe është sulm ndaj gazetarisë investigative dhe lirisë së medias në vend.
“IRL-ja nuk ka as statusin e medias, si mjet për informimin e publikut sipas Ligjit për media, dhe anëtarët e saj nuk kanë statusin e gazetarit dhe as që mund të bëjnë me qëllim të informimit të publikut emisionet gazetareske, të paraqiten si gazetarë ose merren me zhanrin e gazetarisë hulumtuese dhe të gjitha këto t’i publikojnë përmes mjeteve të informimit publik”, shkruan gjyqtarja Jovanka Spirovska Paneva në arsyetimin e aktgjykimit 8P5-33/23.
Nga organizatat nënshkruese të njoftimit thonë se ky qëndrim, si dhe udhëzimi i përmendur se Ministria e Drejtësisë mund t’i ndalojë punën IRL-së, janë të “pashpjegueshme” dhe se presin që aktgjykimi të shfuqizohet.
Aktgjykimi dhe arsyetimi i tij shkaktoi reagim të dhunshëm edhe në Maqedoni, me reagime nga Shpqata e Gazetarëve të Maqedonisë(ShGM) dhe Sindikata e Pavarur e Gazetarëve dhe Punëtorëve të Medias (SPGPM).
“Të ngremë zërin kundër praktikës gjyqësore që ka sjell aktgjykim ndaj Laboratorit të Gazetarëve Investigativ, me të cilin gjykata i ngarkoi vetes rolin e përcaktimit se kush mund dhe kush nuk mund të jetë gazetar. Gjykata nuk ka të drejtë të përcaktojë se cilat media online dhe organizata të shoqërisë civile lejohen të merren me gazetari”, deklarojnë nga ShGM dhe SPGPM.
Të njëjtat organizata organizuan edhe një protestë në mbështetje të IRL-së më 17 nëntor. Në protestë morën pjesë dhjetëra gazetarë të disa mediave.
“Vite më parë gjyqtarët punonin për të mirën e biznesmenëve dhe politikanëve dhe ne gazetarët jemi këtu për të thënë të vërtetën. Askush nuk mund të na heshtë dhe të na pengojë të ngremë zërin apo të shpallim të vërtetën e rëndësishme për qytetarët. Më e rëndësishmja nga të gjitha është pena e gazetarit dhe interesi publik është para çdo gjëje, sepse njerëzit duhet të jenë të vetëdijshëm për atë që po ndodh në vend”, tha gjatë protestës gazetarja Irena Mulaçka.
Përveç kësaj, Komisioni Shtetëror për Parandalimin e Korrupsionit (KSHPK) javën e kaluar thirri Këshillin Gjyqësor të Maqedonisë në kuadër të kompetencave të tij ligjore të shqyrtojë rastin.
Në deklaratën e tyre, Media Freedom Rapid Response thonë se janë të gatshëm të mbulojnë shpenzimet gjyqësore që do të duhet të paguajë IRL dhe bëjnë thirrje për mbështetje dhe solidaritet ndërkombëtar