MTV do të mbyll përgjithmonë kanalet muzikore pas 44 vitesh

Po i vjen fundi epokës për ata që e kaluan rininë duke pritur videoklipet më të fundit muzikore dhe numërimin mbrapsht të top listave në MTV. Paramount Global njoftoi se pas 44 vitesh transmetimi të vazhdueshëm, institucioni kulturor do të mbyllet përgjithmonë deri më 31 dhjetor 2025, transmeton Portalb.mk.

Pesë kanale do të mbyllen në disa vende: MTV Music, MTV 1980, MTV 1990, MTV Club dhe MTV Live. Ato do të ndalojnë transmetimin fillimisht në Mbretërinë e Bashkuar dhe Irlandë, përpara se të mbyllen në Francë, Gjermani, Austri, Poloni, Hungari, Australi dhe Brazil.

Vendimi vjen mes masave agresive për uljen e kostove në Paramount Global, e cila do të bashkohet me Skydance Media këtë vit. Përveç realiteteve financiare, ky veprim vjen ndërsa zakonet mediatike kanë ndryshuar në mënyrë dramatike, me fansat e muzikës që migrojnë drejt opsioneve digjitale.

MTV u lançua në SHBA në vitin 1981 dhe që atëherë ka parë momente historike të kulturës pop: videoklipi “Thriller” i Michael Jackson u shfaq premierë në dhjetor 1983, David Bowie mbështeti artistët me ngjyrë në MTV News, vitet 1990 panë reality show-n pionier “The Real World” dhe të tjera.

MTV filloi transmetimet në Evropë në vitin 1987. Deri në vitet 2010, televizioni tradicional muzikor ishte bërë i vjetëruar me rritjen e mediave sociale dhe transmetimit.

Marka MTV do të vazhdojë përmes platformave digjitale dhe ngjarjeve kryesore, të tilla si VMA dhe EMA. Megjithatë, në ditën e fundit të vitit 2025, televizioni muzikor siç e kanë njohur brezat nuk do të ekzistojë më.