Ligjvënësi amerikan thotë se spiunët kinezë hakeruan emailet e tij
Anëtari republikan i Dhomës së Përfaqësuesve, Don Bacon, tha të hënën se ishte paralajmëruar nga FBI-ja se emailet e tij ishin hakeruar nga spiunët kinezë, transmeton Zëri i Amerikës.
Ligjvënësi shkroi në rrjetin social X se kishte mësuar se Partia Komuniste Kineze kishte qasje në emailet e tij private dhe të fushatës për rreth një muaj, deri më 16 qershor.
Lajmi u raportua fillimisht të hënën nga gazeta “Washington Post”.
Hakerimi ndodhi si rezultat i një dobësie në programin Microsoft, tha Bacon, një referencë e qartë ndaj fushatës së hakerimit të zbuluar nga firma Microsoft muajin e kaluar, gjatë së cilës thuhet se u vodhën qindra mijëra emaile të zyrtarëve të lartë amerikanë, mes tyre
Sekretares së Tregtisë Gina Raimondo dhe ambasadorit amerikan në Kinë, Nicholas Burns.
Rrjeti CNN raportoi më parë se hakerimi i llogarive të postës elektronike të anëtarëve të Dhomës së Përfaqësuesve ishte pjesë e së njëjtës fushatë të njoftuar nga firma Microsoft.
Një zëdhënës i ambasadës kineze tha se lajmi pa baza synonte të njolloste Pekinin, duke shtuar se qeveria amerikane kishte dëmtuar sovranitetin e Kinës me shitjen e armëve Tajvanit, një ishull i vetëqeverisur ndaj të cilit ka pretendime Kina.
Një zëdhënës i ligjvënësit Bacon tha se FBI-ja i kishte thënë atij se hakerët kinezë komprometuan emailin e tij dhe vodhën informacione personale bankare, të dhëna mbi strategjinë politike dhe mbledhjen e fondeve për fushatën.
I zgjedhur në Kongres në vitin 2016, Bacon ka shërbyer si gjeneral brigade në Forcat Ajrore dhe aktualisht shërben në Komisionin e Dhomës së Përfaqësuesve për Forcat e Armatosura, që ndihmon në përcaktimin e buxhetit vjetor për ushtrinë amerikane dhe shpenzimet.
Kongresmeni ka të ngjarë të jetë vënë në shënjestër, sipas zëdhënësit të tij, për shkak të mbështetjes publike për Tajvanin dhe komenteve kritike në lidhje me trajtimin e komunitetit ujgur nga Pekini.
Rikujojtojmë se, në muajin maj hakerë të lidhur me shtetin kinez kanë hyrë në llogaritë e postës elektronike të rreth 25 organizatave, përfshirë ato të qeverisë amerikane, në një fushatë të fshehtë spiunazhi kibernetik, ka njoftuar kompania Microsoft si dhe zyrtarë amerikanë. Zëdhënësi i Këshillit të Sigurisë Kombëtare të Shtëpisë së Bardhë Adam Hodge, tha se një ndërhyrje në sistemin e sigurisë ‘cloud’ të Microsoft kishte “prekur sistemet e paklasifikuara”, por nuk dha detaje të tjera.