Kush janë anëtarët e Antikorrupsionit, të cilët u zgjodhën me biografi të fshehta për publikun
Pas votimit në Kuvendin e Maqedonisë së Veriut, Tatjana Dimitrovska, Cveta Ristovska, Sofija Spasovsa Medarska, Servet Demiri, Besnik Xhemaili, Biljana Karakashova Shulev dhe Zoran Bogoevski janë anëtarët e rinj të Antikorrupsionit, të cilët do të duhet të fillojnë me punë prej 8 shkurtit të vitit të ardhshëm, njofton Portalb.mk.
Sipas asaj që mund të konkludohet fillimisht, shumica e përbërjes së re të KShPK-së do të përbëhet nga revizorë. Bëhet fjalë për Zoran Bogoevskin, Cveta Ristovskën (udhëheqëse e sektorit për revizion) dhe Tatjana Dimitrovskën, e cila do të jetë dhe kryetare e Antikorrupsionit.
Dy nga anëtarët deri tani kanë qenë të punësuar në Komisionin Kundër Korrupsionit – Biljana Karakashova Shulev (këshilltare për monitorimin e korrupsionit në prokurimet publike) dhe Besnik Xhemaili (këshilltar për inspektimin antikorrupsion të legjislacionit në lidhje me aktivitetet me interes publik dhe zhvillim të qëndrueshëm).
Servet Demiri vjen nga Agjencia e Investimeve, ndërsa paraparakisht ka punuar në një trup auditimi për IPA. E vetmja avokate, përkatësisht gjyqtare në komision është gjyqtarja nga Gjykata Themelore Civile Shkup, Sofia Spasova Medarska, bashkëshortja e avokatit Filip Medarski.
Jotransparencë gjatë përzgjedhjes dhe dyshim për votim të orkestruar
Meta.mk, nëpërmjet një analize shkruajti se biografitë e kandidatëve për anëtarë të Komisionit Shtetëror për Parandalimin e Korrupsionit janë sekrete për publikun. Biografitë e printuara i morën vetëm anëtarët e komisionit që vendos për përzgjedhjen e tyre dhe anëtarët që i bënin intervistat.
Atyre u duhej të nënshkruanin një marrëveshje konfidencialiteti sepse biografitë përmbanin “të dhëna personale”. Mbetet e paqartë se pse këto të dhëna, si numri i vetëm amë i qytetarit, adresa e banimit apo numri i telefonit nuk u fshehën, pra nuk u fshinë dhe pastaj të njëjtat të publikoheshin në mënyrë që publiku të mund të shihte se cilët kandidatë pretendojnë të luftojnë kundër korrupsionit në katër vitet e ardhshme.
Nga ana tjetër intervistimi i kandidatëve, ndërsa në emër të transparencës, u transmetua në kanalin parlamentar, por për këtë transmetim nuk kishte asnjë njoftim, ndërsa kanali parlamentar nuk mund të rishikohet edhe pas transmetimit të programeve, siç është rasti me kanalet e tjera televizive. Për këtë shkak vihet në pikëpyetje se sa përzgjedhja e antikorrupsionerëve të ardhshëm ishte transparente, apo thjesht fshihet pas perdes së llogaridhënies.
Anëtarë të komisionit që bën vlerësimin e kandidatëve ishin Eli Panova nga VMRO-DPMNE, Berat Ajdari nga BDI, Fanica Nikolloska nga LSDM dhe Kastriot Rexhepi nga Lëvizja Demokratike. Krahas këtyre në komision ishin edhe Jovan Andonovski, zëvendës i Avokatit të Popullit, Nikolla Dodov dhe Snezhana Kamillovska Trpovska nga Këshilli për Bashkëpunim dhe Zhvillim të Sektorit Civil.
Për përzgjedhjen e kandidatëve, reagim të ashpër pati nga sektori civil. Pas publikimit të rang-listës së kandidatëve për përbërjen e radhës të Komisionit Shtetëror për Parandalimin e Korrupsionit (KSHPK), anëtarja e Komisionit për Selektim për Zgjedhjen e Kryetarit dhe Anëtarëve të Komisionit Kundër Korrupsion Snezhana Kamilovska-Tërpovska bëri me dije se ka mendim të ndryshëm në lidhje me listën e përcaktuar në të cilën, sipas saj, vë në dukje votim të njëanshëm dhe të orkestruar nga anëtarët e tjerë të Komisionit.
“Nga ranglista e treguar shihet se si përfaqësues i sektorit civil në fushën e demokracisë dhe sundimit të ligjit kam një perceptim krejtësisht të ndryshëm për kandidatët e zgjedhur, gjë që tregon qartë qëndrimin e organizatave të shoqërisë civile në lidhje me përbërjen e ardhshme”, thuhet në letrën Kamilovska–Tërpovska.
Ajo tha se është e habitshme se si përfaqësuesit e tjerë të Komisionit për Selektim “gjetën kompromis pikërisht dhe vetëm për këta kandidatë, pavarësisht intervistave të dobëta, refuzimit për t’iu përgjigjur pyetjeve të drejtpërdrejta për situata sociale, si procesi i kapjes së shtetit, rastet e korrupsionit të lartë, që tashmë janë objekt i punës së KShPK-së aktuale, si dhe janë pjesë e situatave të konstatuara nga Raporti i Komisionit Evropian për vitin 2023, çështje që lidhen me lidhjet politike dhe gjyqësore, tregtimin e ndikimit, lobimin, dhe ngjashëm”.
Përveç kësaj, shtoi Kamilovska –Tërpovska, kandidatët që treguan njohuri të shkëlqyera të fushës, gatishmëri për të dhënë përgjigje të drejtpërdrejtë dhe të qartë dhe me kompetenca të shkëlqyera, nuk u vlerësuan mirë nga anëtarët e tjerë, gjë që i pengoi ata të luftonin për postin e kryetarit dhe anëtarit të KShPK-së.
Edhe Platforma e Organizatave Civile për Luftën kundër Korrupsionit, ka reaguar ashpër duke theksuar se ka pasur ndikime partiake dhe manipulim të procesit të përzgjedhjes së anëtarëve të rinj të Antikorrupsionit duke e mbështetur plotësisht Kamilovska-Trpovskën.